Qazaqstannyń biregeı geosaıası orny onyń bolashaq damý múmkindikterin aıqyndaıdy — Oleg Goşanskıı
ASTANA. KAZINFORM — Qazaqstandaǵy ınvestıtsııalyq ahýaldyń turaqtylyǵy men memlekettiń pragmatıkalyq saıasaty sheteldik ınvestorlardyń senimin arttyryp otyr. Bul týraly Qazaqstan Respýblıkasy janyndaǵy Sheteldik ınvestorlar keńesiniń 38-shi plenarlyq otyrysynda KPMG EMA basqarma tóraǵasynyń keńesshisi Oleg Goşanskıı málim etti.
Onyń aıtýynsha, Qazaqstan Ortalyq Azııa men Kavkaz klasterindegi negizgi óńirlik ortalyqqa aınalǵan. Sondaı-aq ınvestorlardyń Qazaqstanǵa kelýi jáne ınvestıtsııa kóleminiń artýy eldegi ınvestıtsııalyq ahýaldyń olardyń talaptaryna saı ekenin kórsetedi.
— Halyqaralyq qarjy ınvestorlary óz úmitin aqtamaıtyn elge eshqashan qarjy salmaıdy. Sondyqtan olardyń laıyqty tabysqa qol jetkizýi, ınvestıtsııalaryn tıimdi qaıtarý múmkindigi, sondaı-aq memleket tarapynan beriletin kepildikter men turaqtylyqtyń úılesýi Qazaqstandy ınvestıtsııa salýǵa qolaıly el etedi. Taǵy da qaıtalap aıtamyn, elimizge kelip jatqan qarjylyq ınvestıtsııalar kólemi turaqty túrde ósip keledi, — dep jaýap berdi jýrnalıster suraǵyna.
Sonymen qatar ol Qazaqstannyń ınvestıtsııalyq tartymdylyǵyn arttyratyn birneshe mańyzdy artyqshylyqqa toqtaldy.
— Birinshiden, elimizdiń geografııalyq ornalasýy. Qazaqstannyń biregeı geosaıası orny onyń bolashaq damý múmkindikterin aıqyndaıdy. Ekinshiden, Qazaqstan memleketi saıası jáne ekonomıkalyq turǵydan baıypty ári pragmatıkalyq saıasat ustanady. Memlekettiń júrgizip otyrǵan saıasaty ınvestorlarǵa óz ınvestıtsııalarynyń bolashaǵyn aıqyn kórýge, erteńgi kúnge senimmen qaraýǵa múmkindik beredi. Memleket qamtamasyz etetin turaqtylyq, jaıly ınvestıtsııalyq orta men qaýipsizdik ınvestorlar úshin asa mańyzdy faktorlar, — dedi ol.
Sondaı-aq Oleg Goşanskıı qazirgi tańda ınvestıtsııalyq úderisterdiń sapalyq turǵydan ózgerip jatqanyn atap ótti.
— Búginde kóptegen ózgeris bolyp jatyr. Investıtsııa kólemi ǵana emes, olardyń sapasy da artyp keledi, elimizge keletin salalardyń quramy ózgerip jatyr. Jasandy ıntellekt barlyq salaǵa qarqyndy enip jatyr. Biz jasandy ıntellektige baılanysty qyzmetterge suranystyń, sonyń ishinde ulttyq kompanııalar tarapynan da, aıtarlyqtaı artqanyn baıqap otyrmyz. Sonymen birge Qazaqstanǵa keletin ınvestorlar óz ınvestıtsııalarymen qatar jasandy ıntellekt tehnologııalaryn engizýge jáne olardy osy eldegi ınvestıtsııalyq jobalarda qoldanýǵa daıyn ekenin kórip otyrmyz, — dep tolyqtyrdy ol.
Onyń pikirinshe, memleket pen ınvestorlar arasyndaǵy dıalogty odan ári damytý, ınvestıtsııalar kólemi men sapasyn arttyrý jáne Qazaqstannyń halyqaralyq ınvestıtsııalar úshin tartymdylyǵyn kúsheıtý aldaǵy kezeńdegi negizgi mindetterdiń biri bolyp qala beredi.
Aıta keteıik, EQDB Qazaqstan ekonomıkasyna 1,3 mlrd eýrodan astam ınvestıtsııa salýy múmkin.
