Qazaqstannyń bolashaq AES-terine qajet mamandardy qaı elder daıyndap jatyr

ASTANA. KAZINFORM – Qazaqstanda atom salasy úshin bilikti kadrlar daıarlaý belsendi júrgizilip jatyr. Bul týraly Kazinform saýalyna joldaǵan jaýabynda Energetıka mınıstrligi málim etti.

- Mamandardy daıarlaý fızıka, energetıka, elektrotehnıka, taý-ken ınjınırıngimen baılanysty 18 bilim berý baǵdarlamasy boıynsha júrgiziledi. 2024-2025 oqý jylyna osy baǵyttar úshin 5 246 bilim berý granty bólindi. Onyń ishinde bakalavrıat – 4 530 grant, magıstratýra – 590 grant, doktorantýra – 126 grant. Daıyndyq otandyq ýnıversıtetterde de, ıadrolyq tehnologııalarǵa mamandanǵan jetekshi sheteldik joǵary oqý oryndarymen yntymaqtastyqta da júzege asyrylady. «Bolashaq» memlekettik baǵdarlamasy boıynsha «Atom jáne ıadrolyq ónerkásip» mamandyǵy basym baǵyttardyń qataryna kiredi. 2024 jyldan bastap osy baǵdarlama boıynsha tórt magıstrant AQSh, Ulybrıtanııa jáne Frantsııada bilim alyp jatyr, - dep jazylǵan mınıstrlik málimetinde.

Bul elderdiń qataryna Reseı men Majarstan qosylmaq.

- Atom salasy boıynsha kadrlardy daıarlaý qazaqstandyq joǵary oqý oryndarynda 5 bilim berý jáne eki dıplomdyq baǵdarlamalar (ıAdrolyq fızıka, ıadrolyq ınjenerııa, ıadrolyq fızıka jáne atom energetıkasy, teorııalyq ıadrolyq fızıka) negizinde júrgiziledi. Sonymen qatar, Qazaqstan sheteldik áriptestermen ǵylymı-bilim berý bazasyn damyta bastady. Frantsııa, Reseı jáne Vengrııamen birqatar qujatqa qol qoıyldy.

Qazaqstan Respýblıkasynyń otyn-energetıkalyq keshenin damytýdyń 2023-2029 jyldarǵa arnalǵan tujyrymdamasyna sáıkes, atom salasyn joǵary bilikti kadrlarmen qamtamasyz etý úshin sheteldik baǵdarlamalar boıynsha oqýǵa granttar bólý boıynsha jumys júrgiziledi. Sondaı-aq jumys istep turǵan AES-terde praktıkalar men taǵylymdamalardan ótý uıymdastyrylady, - delingen resmı jaýapta.

Aıta ketsek, Prezıdent Qasym-Jomart Toqaev Býrabaıdaǵy Ulttyq quryltaıda ıAdrolyq energetıka agenttigin qurýdy tapsyrǵan bolatyn. Onyń tóraǵasy bolyp Almasadam Sátqalıev taǵaıyndaldy.