Qazaqstannyń beıbitshilik pen turaqtylyqty ilgeriletý jolyndaǵy rólin joǵary baǵalaımyz – Iordanııa Koroli

ASTANA. KAZINFORM – Qazaqstan-Iordanııa bıznes forýmy eki el arasyndaǵy yntymaqtastyqty jańa deńgeıge kóteredi. Bul týraly búgin Aqordada Memleket basshysy Qasym-Jomart Toqaevpen keńeıtilgen quramdaǵy kelissóz barysynda Iordanııa Koroli II Abdalla ben ál-Hýseınmen aıtty. 

– Iordanııa qarym-qatynastarymyzdy óte joǵary baǵalaıdy ári tolyq qoldaıdy. Búgingi kezdesýde ózara baılanystarymyzdy, túrli salalardaǵy ekijaqty qarym-qatynastarymyzdy taǵy bir márte rastadyq. Buǵan deıingi kelissózderimizdiń qorytyndysynda birneshe kelisim men ózara túsinistik týraly memorandýmdarǵa qol qoıǵan edik. Búgin de jańa salalarda jańa kelisimderdi rásimdeımiz, - dedi Iordanııa Koroli.

Mártebeli meımannyń atap ótýinshe, rásimdeletin qujattar densaýlyq saqtaý, aýyl sharýashylyǵy jáne basqa da mańyzdy baǵyttardaǵy eki el yntymaqtastyǵy úshin berik negiz bolmaq.

– Sonymen qatar búgingi bıznes-forým – jeke sektordaǵy jáne jalpy eki el arasyndaǵy yntymaqtastyqty jańa deńgeıge kóteretin taǵy bir qadam. Munan bólek, biz Qazaqstannyń beıbitshilik pen turaqtylyqty ilgeriletý jolyndaǵy syndarly rólin joǵary baǵalaıtynymyzdy taǵy da atap ótkim keledi. Taıaý Shyǵystaǵy jaǵdaıdy turaqtandyrýǵa kómektesip jatqandaryńyz úshin alǵys bildiremin, - dedi II Abdalla ben ál-Hýseın.

Buǵan deıin Qasym-Jomart Toqaev Aqordada Iordanııa Korolin qarsy alǵanyn jazǵan edik. 

Esterińizge sala ketsek, keshe Prezıdent Qasym-Jomart Toqaev Iordanııa Korolin Astana áýejaıynan qarsy alǵan edi. 

Mártebeli meıman mingen bortty el shekarasynan elordaǵa deıin Qazaqstan Respýblıkasy Áýe qorǵanysy kúshteriniń ushaqtary alyp júrdi.