Qazaqstannyń Beıbitshilik keńesine qatysýy eldiń syrtqy saıasatyna saı— Aıgúl Quspan

ASTANA. KAZINFORM — Májilistiń Halyqaralyq ister, qorǵanys jáne qaýipsizdik komıtetiniń tóraıymy Aıgúl Quspan Jibek Joly telearnasyndaǵy «Ýáde» baǵdarlamasynda Qazaqstannyń AQSh prezıdenti Donald Tramp bastamashy bolǵan Beıbitshilik keńesi quramyna kirýine qatysty pikir bildirdi.

— Eń aldymen, bul keńes bizdiń syrtqy saıasattaǵy logıkamyzǵa sáıkes keledi. Bizdiń syrtqy saıasatymyzdyń logıkasy — bitimgershilik, kópjaqty yntymaqtastyq jáne halyqaralyq senim. Qazaqstan jaýapty, senimdi jáne beıbitshil seriktes retinde qabyldanady. Sondyqtan elimizdiń keńes quramyna qosylýǵa shaqyrylýy ábden oryndy, — dedi depýtat.

Sonymen qatar, Aıgúl Quspan Qazaqstannyń Beıbitshilik keńesine qatysýy elge halyqaralyq mańyzdy máselelerde, sonyń ishinde Gaza qaqtyǵysyn retteý máselesinde óz pozıtsııasyn tıimdi kórsetýge múmkindik beretinin atap ótti.

Eske salaıyq, bıyl qańtarda AQSh Prezıdenti Donald Tramp Memleket basshysy Qasym-Jomart Toqaevty Gaza boıynsha qurylatyn Beıbitshilik keńesiniń quramyna kirýge resmı shaqyryp, al Qazaqstanǵa quryltaıshy memleketterdiń biri bolýdy usyndy.

Kazinform analıtıkalyq sholýshysy sarapshylarmen birge bul jańa uıym álemdik tártipke qalaı yqpal etetinin baǵamdady.

Memleket basshysy Qasym-Jomart Toqaev Davosta AQSh Prezıdenti Donald Tramptyń bastamasymen qurylǵan Beıbitshilik keńesiniń Jarǵysyna qol qoıdy.

AQSh-tyń Qazaqstandaǵy elshisi Djýlı Stafft Astanadaǵy AQSh Elshiliginde ótken resmı baspasóz máslıhatynda Qazaqstannyń Gaza sektoryn qalpyna keltirý máselelerimen aınalysatyn Beıbitshilik keńesindegi mańyzdy rólin atap ótti.