Bes óńirde jerasty sýynyń jańa kózderin anyqtaý boıynsha barlaý jumystary júrgiziledi
ASTANA. KAZINFORM - Sý resýrstary jáne ırrıgatsııa mınıstrligi 2027 jylǵa deıin Aqmola, Batys Qazaqstan, Qostanaı, Jetisý men Ulytaý oblystarynda jerasty sýynyń jańa kózderin anyqtaý boıynsha keshendi izdestirý-barlaý jumystaryn júrgizýdi josparlap otyr.
Bul sharalar jerasty sý qorynyń resýrstyq bazasyn keńeıtýge jáne eldi mekenderdi, aýyl sharýashylyǵyn jáne ekonomıkanyń ózge de salalaryn qosymsha sýmen qamtamasyz etýge baǵyttalǵan. Sonymen qatar 2026 jyly jerasty sý ken oryndaryn barlaýǵa arnalǵan 28 jańa joba ázirleý josparlanǵan. Onyń ishinde 9 joba Jambyl oblysynda, 3 joba Aqmola oblysynda, 4 jobadan Batys Qazaqstan jáne Túrkistan oblystarynda, Mańǵystaý men Atyraý oblystarynda eki jobadan jáne bir jobadan Shyǵys Qazaqstan, Pavlodar, Qyzylorda oblystary men Ulytaý óńirinde júzege asyrylady.
Jalpy Qazaqstan aýmaǵynda aýyzsý, tehnıkalyq jabdyqtaýǵa, sýarý jáne basqa da sharýashylyq maqsattarǵa arnalǵan 4 803 jerasty sý ken orny barlanǵan.
Memlekettik balans derekterine sáıkes, jerasty sýynyń táýliktik paıdalanýǵa bolatyn qory 43,2 mln tekshe metr. Alaıda qazirgi tańda onyń tek shamamen 1,5 mln tekshe metri ǵana paıdalanylyp otyr, bul jalpy kólemniń 3,6%-y. Barlanǵan qor qurylymynda 21,2 mln tekshe metr aýyzsý men turmystyq qajettilikke, 2,4 mln tekshe metr óndiristik-tehnıkalyq maqsattarǵa, 19,6 mln tekshe metr sýarmaly eginshilikke baǵyttalǵan.
- Sý resýrstarynyń tapshylyǵy artyp, klımattyq ózgerister kúsheıip jatqan jaǵdaıda jerasty sýynyń áleýetin damytý – turaqty sý paıdalanýdy qamtamasyz etýdiń negizgi baǵyttarynyń biri. Jerasty sý qorynyń áleýeti joǵary bolǵanymen, onyń edáýir bóligi áli tolyq zerttelmegen. Osyǵan baılanysty Sý resýrstary jáne ırrıgatsııa mınıstrligi jerasty sýyn keshendi paıdalaný tujyrymdamasyn ázirleýdi bastady. Bul qujat jerasty sý resýrstaryn basqarýdyń zamanaýı júıesin qalyptastyrýǵa baǵyttalǵan. Tujyrymdamany iske asyrý jerasty sýyn tıimdi ıgerýge, eldi mekender men ekonomıkany utymdy jáne turaqty sýmen qamtamasyz etýge, sondaı-aq sý qoryn saqtaýǵa jáne qalpyna keltirýge múmkindik beredi, – dedi Sý resýrstary jáne ırrıgatsııa vıtse-mınıstri Talǵat Momyshev.
Osyǵan deıin Qazaqstan sý resýrstaryn 15 jyldyq strategııaǵa saı keshendi josparlaýǵa kóshetini týraly jazdyq.
