Qazaqstannyń Belgııadaǵy elshiliginde kıiz úı tigildi
ASTANA. KAZINFORM – Qazaqstan Prezıdenti Qasym-Jomart Toqaevtyń Belgııaǵa resmı sapary qarsańynda Brıýsseldegi Qazaqstan dıplomatııalyq mıssııasynyń aýmaǵynda dástúrli kıiz úı tigildi, dep habarlaıdy Kazinform agenttiginiń Eýroodaqtaǵy menshikti tilshisi.
Qazaqstannyń Belgııadaǵy elshiligi Eýropadaǵy aýmaǵy eń úlken dıplomatııalyq ókildikterdiń biri sanalady. Brıýsseldiń tynysh Ýkkl aýdanynda ornalasqan elshilik kóne ǵımaraty men ásem aýmaǵynyń arqasynda jergilikti turǵyndardyń nazaryn aýdarady.
Qazir elshilik aýmaǵyndaǵy kógalda ulttyq naqyshpen bezendirilgen qazaqtyń kıiz úıi tigilgen. Dıplomattar ony jumys kezdesýlerin ótkizý úshin paıdalanyp júr.
Eýropa saıasatynyń qaq ortasynda, dál osy shańyraq astynda Qazaqstannyń Eýroodaqtaǵy elshisi Roman Vasılenko men Eýroodaqtyń Qazaqstandaǵy ókildiginiń basshysy Aleshka Sımkıch ekijaqty áriptestiktiń qazirgi jaı-kúıi men keleshegine arnalǵan birlesken podkast jazdy.
– Brıýsselde bizdiń kıiz úıimizdiń bolǵanyna óte qýanyshtymyn. Bul – biz úshin erekshe oryn, munda ózimizdi úıdegideı sezinemiz, – dedi Roman Vasılenko.
Óz kezeginde eýropalyq dıplomat kıiz úıdiń Astana men Brıýssel arasyndaǵy qatynastardyń jańa ári ózara senimge negizdelgen deńgeıge kóterilgeniniń jarqyn sımvolyna aınalǵanyn atap ótti. Aleshka Sımkıchtiń pikirinshe, búgingi tańda taraptar arasyndaǵy ózara is-qımyl dástúrli sheńberden asyp tústi.
– Meniń oıymsha, bizdiń qarym-qatynasymyzdy jaı ǵana strategııalyq áriptestik emes, strategııalyq dostyq dep ataýǵa bolady, – dedi Aleshka Sımkıch.
Eske salaıyq, Memleket basshysynyń Brıýsselge resmı saparynyń eki kúndik baǵdarlamasy óte mazmundy bolmaq. Baǵdarlama aıasynda Prezıdent Eýropalyq keńestiń tóraǵasy Antonıý Koshtamen jáne Eýropalyq komıssııanyń tóraıymy Ýrsýla fon der Lıaıenmen kelissózder ótkizedi. Sonymen qatar eýropalyq bıznes qaýymdastyǵy jetekshilerimen aýqymdy dóńgelek ústel otyrysy josparlanǵan.
Sarapshylardyń pikirinshe, Brıýsseldegi qazaqtyń kıiz úıi bul kúnderi mádenı dıplomatııanyń ǵana emes, Qazaqstan men Eýroodaq arasyndaǵy qazirgi qarym-qatynastyń da sımvolyna aınaldy. Olar shyǵystyq qonaqjaılyq pen pragmatıkalyq ulttyq múdde eýropalyq mańyzdy sheshimder qabyldanatyn ortalyqpen tabıǵı túrde ushtasyp otyrǵanyn atap ótedi.
Aıta keteıik, keshe keshkisin Memleket basshysy Eýropalyq keńestiń tóraǵasy Antonıý Koshtamen beıresmı kezdesý ótkizgeni habarlandy.
