Qazaqstannyń Belarýsqa taýar eksporty 2 ese artty

ASTANA. KAZINFORM — Qazaqstannyń Belarýsqa taýar eksporty 2 ese artty. Bul týraly Belarýs Respýblıkasynyń Qazaqstandaǵy Tótenshe jáne Ókiletti elshisi Alekseı Bogdanov aıtty.

— Bıyl ózara taýar aınalymynyń artqanyn baıqap otyrmyz. Taýar aınalymy 17 paıyzǵa artty. Bul rette Belarýstan da, Qazaqstannan da taýar jetkizilimi ulǵaıa túsýde. Bir qyzyǵy, Qazaqstannyń bizdiń elge taýar jetkizý qarqyny 2 ese qarqynmen ósim kórsetip otyr. Múmkin buǵan ótken jylǵy tómen baza áser etken shyǵar. Qalaı degende ózara taýar aınalymynyń oń qarqyny kóńilden shyǵady. Aldaǵy birneshe jyldyń ishinde ony 1,5 mlrd dollarǵa jetkizý mindeti bar. Sońǵy jyldary 1 mlrd dollarǵa jetti, — dedi Alekseı Bogdanov.

Onyń aıtýynsha, Belarýs elimizge mashına jasaý salasyna qatysty ónimder jetkizedi. Belarýs traktorlary men kombaındar qurastyrylady. Azyq-túlik taýarlaryna da suranys bar.

— Qazaqstanda belarýs azyq-túlikterine suranystyń joǵary bolǵanyna qýanamyz. Tutynýshylarymyzdyń mundaı talǵamyn joǵary baǵalaımyz. Barlyq taýar Belarýs veterınarlyq jáne sanıtarlyq qyzmetteriniń qatań baqylaýymen óndiriledi. Qazaqstannan aýyl sharýashylyǵy ónimderin, óndeý ónerkásibimizge qajetti túrli ferroqorytpalar, metalldar, rezeńke alamyz, — dedi ol.

Aıta keteıik, 22-24 qazan kúnderi elordada alǵash ret Qazaqstan-Belarýs agrarlyq forýmy ótedi.