Qazaqstannyń Batysyndaǵy energojúıeni jańǵyrtý: Atyraý oblysynda jańa jeli iske qosyldy
Atyraý oblysynda Qazaqstannyń Batys aımaǵynyń elektr jelilerin nyǵaıtý maqsatynda salynǵan jańa elektr jelileri iske qosyldy. Resmı qosý rásimine telekópir arqyly Premer-Mınıstr Álıhan Smaıylov qatysty. Kazinform bul týraly primeminister.kz saıtyna silteme jasap habarlaıdy.
Jeliniń ótkizý qabiletin arttyrý jáne Qazaqstannyń Batys aımaǵyndaǵy tutynýshylardy turaqty energııa qýatymen qamtamasyz etý maqsatynda «KEGOC» AQ «Batys Qazaqstan energetıkalyq toraby – Atyraý – Mańǵystaý» baǵyty boıynsha jalpy uzyndyǵy 780 shaqyrymǵa jýyq 220 kV bes elektr berý jelisin saldy. Jumys barysynda 4,2 myńnan astam elektr baǵanalary ornatylyp, «Ýralskaıa», «Pravoberejnaıa», «Inder», «Qulsary», «Teńiz» qosalqy stantsııalaryn keńeıtý qamtamasyz etildi, sondaı-aq «Qarabatan» jańa taratýshy qosalqy stantsııasy iske qosyldy.
Jobany iske asyrý nátıjesinde elektr jelisiniń qýattylyǵy aıtarlyqtaı ulǵaıtyldy: «Batys Qazaqstan energetıkalyq toraby – Atyraý» ýchaskesinde 100 MVt-tan 200 MVt-qa deıin; «Atyraý – Mańǵystaý» ýchaskesinde 50 MVt-tan 200 MVt-qa deıin. Nátıjesinde Batys aımaq jelisiniń senimdiligi eki esege artyp, apat yqtımaldyǵy tómendedi.
Álıhan Smaıylov óz sózinde bul strategııalyq mańyzdy jobanyń Batys aımaǵynyń energetıkalyq qaýipsizdigin qamtamasyz etý jáne ekonomıkalyq damýy úshin mańyzy zor ekenin atap ótti.
«Munyń barlyǵy elektr jelileriniń ótkizý qabiletin eki esege ulǵaıtýǵa, sondaı-aq elimizdiń batys óńirindegi tutynýshylar úshin energobloktarda, onyń ishinde MAEK stantsııasynda avarııalyq jaǵdaılardyń sanyn edáýir azaıtýǵa múmkindik beredi», — dedi Premer-Mınıstr.
Batys aımaqtyń elektr jelisin nyǵaıtý, sonymen qatar onyń ári qaraı Qazaqstannyń Biryńǵaı elektr energetıkasy júıesimen ıntegratsııalanýyna negiz bolmaq.
«KEGOC» AQ basqarma tóraǵasy Nábı Aıtjanov qurylys jumystary kezinde qoldanylǵan zamanaýı elektr jelisi jabdyqtary joǵary ónimdiligimen erekshelenetinin atap ótti.
«"Inder’’ qosalqy stantsııasynda ornatylǵan basqarylatyn qosymsha reaktorlar kerneýdi aýystyrmastan turaqtandyratyn biregeı keshen bolyp tabylady. Ol sondaı-aq belsendi jáne reaktıvti qýat aǵynyn jyldam basqarýǵa múmkindik beretin uzaq elektr berý jelileri men taratý jelileriniń ysyraptaryn azaıtyp, jumysynyń senimdiligin arttyrady», — dedi Nábı Aıtjanov.
Qurylys jumystaryna otandyq metall jáne temirbeton tirekteri, symdar, oqshaýlaǵyshtar men transformatorlar paıdalanyldy. Qazaqstandyq qamtý úlesi shamamen 70% qurady.
