Qazaqstannyń batysynda shaǵyn AES salynýy múmkin

ASTANA. KAZINFORM — Elimizdiń batysynda taǵy bir AES paıda bolýy múmkin. Bul týraly Atom energııasy jónindegi agenttiginiń tóraǵasy Almasadam Sátqalıev málim etti. 

Osy oraıda Kaspıı teńiziniń jaǵalaýy qarastyrylýy yqtımal.

— Oryn áli naqtylanbaǵan. Bul óńir shaǵyn jáne orta qýatty reaktorlary bar atom elektr stantsııasynyń áleýetti orny retinde qarastyrylyp otyr. Osy oraıda MAGATE-niń barlyq negizgi nusqaýyna súıene otyryp, jaqyn arada atom elektr stantsııasyn salý múmkindigine qatysty tıisti zertteý júrgiziledi.

Bul baǵytta seısmıkalyq qaýipsizdikti, sý qoımasynyń bolýy jáne sýdy jetkilikti deńgeıde qamtamasyz etý jaǵdaıy qarastyrylady. Atap aıtqanda, agenttikte atom elektr stantsııasyn salý úshin batys óńirdi zertteý jospary bar jáne biz bul ýchaskeniń bolashaǵy zor ekenin túsinip otyrmyz, — dedi Almasadam Sátqalıev Parlament Májilisindegi baspasóz máslıhatynda.

Budan buryn habarlanǵandaı, Almaty oblysynda eki atom elektr stantsııasyn salý josparlanyp otyr.