Qazaqstannyń batysynda iri esirtki arnasynyń joly kesildi
ORAL. KAZINFORM — BQO Polıtsııa departamentiniń qyzmetkerleri elimizdiń batys óńirlerine iri kólemde esirtki jetkizý arnasyn áshkereledi.
BQO polıtsııa departamentiniń baspasóz qyzmetinen málim etkenindeı, esirtki qylmysyna qarsy is-qımyl basqarmasynyń qyzmetkerleri mańǵystaýlyq áriptesterimen birlesip júrgizgen jedel izdestirý is-sharalary barysynda esirtki zattarynyń zańsyz aınalymyna qatysy bar degen kúdikpen er adamdy ustady.
Polıtsııa qyzmetkerleri 41 jastaǵy azamattyń izine túsip, onyń Jambyl oblysynan Qazaqstannyń batys óńirlerine esirtki jetkizý arnasyn uıymdastyrǵanyn anyqtady. Tyıym salynǵan júkti tasymaldaý úshin júk tasymaldaý qyzmetteri paıdalanylyp, esirtkiler qarapaıym sálemdeme retinde jasyrylǵan.
Kúdikti Aqtaý qalasynda sálemdemeni alyp jatqan sátinde qylmys ústinde ustaldy. Sálemdemeni tekserý barysynda polıtsııa qyzmetkerleri ishinde ósimdik tektes zat salynǵan eki qapty tapty.
- Saraptama qorytyndysy tárkilengen zattyń keptirilgen marıhýana ekenin rastady. Tárkilengen esirtki zatynyń jalpy salmaǵy 33,5 keliden asty. Tergeý málimetterine sáıkes, atalǵan esirtki partııasy elimizdiń batys óńirlerinde odan ári taratylýǵa arnalǵan. Osy derek boıynsha sotqa deıingi tergep-tekserý bastaldy. Esirtki jetkizý arnasynyń jolyn kesý nátıjesinde tyıym salynǵan iri kólemdegi zattardyń zańsyz aınalymǵa túsýine jol berilmedi, - dep habarlady vedomstvodan.
Eske sala keteıik, budan buryn Oralda alkogol ónimderin zańsyz satýdyń 140-tan astam deregi anyqtalǵanyn jazǵan edik.
