Qazaqstannyń batysynda esirtki jetkizý arnalary joıyldy
ORAL. KAZINFORM — BQO polıtsııa departamentiniń esirtki qylmysyna qarsy is-qımyl basqarmasy oblys prokýratýrasynyń úılestirýimen Batys Qazaqstan jáne Aqtóbe óńirlerine esirtki jetkizý arnalaryn joıdy.
BQO polıtsııa departamentiniń baspasóz qyzmetinen málim etkenindeı, jedel izdestirý is-sharalary barysynda Aqtóbe qalasynda Toyota avtokóligi toqtatyldy.
Avtokólik ishindegi taksı jolaýshysyn tintý kezinde erekshe ıisi bar, jasyl tústi ósimdik zat salynǵan sómke tabyldy. Saraptama qorytyndysyna sáıkes bul zat salmaǵy 10 kg shamasynda keptirilgen marıhýana bolyp shyqty. Qolǵa túsken Qyzylorda qalasynyń 35 jastaǵy turǵyny ýaqytsha ustaý ızolıatoryna qamaýǵa alynyp, sotqa deıingi tergeý amaldary júrgizilýde.
— Sondaı-aq Aqtóbe qalasynda jedel izdestirý is-sharalary barysynda Oral qalasynyń 30 jastaǵy turǵyny ustaldy. Ol sıntetıkalyq esirtkilerdiń oblysaralyq jetkizilýin uıymdastyrdy degen kúdikke ilindi. Polıtsııa qyzmetkerleri kúdiktini esirtki jasyryp jatqan kezde ustady. Ony jeke tintý kezinde árqaısysynda 25 shaǵyn túıinshegi bar eki iri orama tabyldy. Oqıǵa ornyn tekserý kezinde polıtsııa qyzmetkerleri úsh úlken orama taýyp, onyń ishinen 60 túıinshek shyqty, olardyń barlyǵy erekshe ıisi bar untaq zatpen toltyrylǵan. Kúdiktiniń Aqtóbe qalasynda jalǵa alynǵan páterin tekserý kezinde ishinde esirtki zaty bar 22 zıp-paket jáne esirtki oraý úshin qoldanylatyn zıp-paketter, folga jáne ızolenta tabyldy. Barlyǵy esirtki zaty bar 132 túıinshek tárkilendi, bul qylmystyq árekettiń aýqymdy ekenin rastaıdy. Kúdikti ýaqytsha ustaý ızolıatoryna qamalyp, oǵan qatysty sotqa deıingi tergeý bastaldy, — dep habarlady vedomstvodan.
Eske sala keteıik, budan buryn BQO-da esirtkige qatysty 346 quqyq buzýshylyq anyqtalǵanyn jazǵan edik.