Qazaqstannyń batys óńirine esirtki zattaryn jetkizý arnalary joıyldy
Qazaqstannyń batys óńirlerine esirtki zattaryn jetkizý arnalary joıyldy, dep habarlaıdy Kazinform Polisia.kz-ke silteme jasap.
QR ІІM esirtkige qarsy is-qımyl departamentiniń jáne BQO PD esirtkige qarsy is-qımyl basqarmasynyń qyzmetkerleri arnaıy operatsııa júrgizý barysynda óńiraralyq qylmystyq toptyń Qazaqstannyń batys óńirlerine esirtki zattaryn jetkizý arnalaryn joıdy.
Qylmystyq top Almaty, Shymkent, Batys Qazaqstan jáne Aqtóbe oblystarynyń 8 turǵynynan quralǵan. Olar Oral jáne Aqtóbe qalalaryndaǵy azyq-túlik dúkenderi jelisi arqyly kóknár ónimin satýmen aınalysqan.
Qylmystyq topqa qatysýshylardyń árqaısysyna tıisili jumystary bolǵan: Shymkent qalasynyń turǵyny – uıymdastyrýmen aınalyssa, Almaty qalasynyń turǵyny – esirtki zattaryn jetkizýshi, al qalǵandary esirtki zattaryn azyq-túlik dúkenderi arqyly satýmen aınalysqan.
Azyq-túlik dúkenderin tintý kezinde esirtki zattary, eritkish zattary salynǵan qoraptar, grammen ólshenetin elektrondy tarazylar tabylyp, tárkilendi.
Sondaı-aq ár dúkende qarajattyń kiris jáne shyǵysyn esepteýge arnalǵan kassa jýrnaldary tabyldy.
Jedel-izdestirý is-sharalary barysynda 994 qap qosyndy qosylǵan kóknár sabaǵy, 10 qoraptan astam eritkish zaty, 5 mln teńge kólemindegi aqshalaı qarajat, qymbat baǵadaǵy 4 jeńil avtokóligi (qylmystyq áreketten túsken qarajatqa alynǵan), DAF júk kóligi tárkilendi. Saraptama qorytyndysy boıynsha tárkilengen kóknár sabaǵynyń jalpy salmaǵy 1,635 keli 257 grammdy quraıdy.
QR QK-niń 262-baby 1-bóligi (Uıymdasqan topty nemese qylmystyq uıymdy qurý), QR QK-niń 262-baby 2-bóligi (Uıymdasqan topqa nemese qylmystyq uıymǵa qatysý), QR QK-niń 2018-baby 1-bóligi (Qylmystyq jolmen alynǵan aqshany jáne (nemese)ózge múlikti zańdastyrý (jylystatý)) jáne QR QK-niń 297-baby 3-bóligi (Esirtki, psıhotroptyq zattardy, sol tektesterdi ótkizý maqsatynda zańsyz daıyndaý, qaıta óńdeý, ıemdený, saqtaý, tasymaldaý, jóneltý ne ótkizý) boıynsha BQO polıtsııa departamentimen sotqa deıingi tergeý jumystary júrgizilip jatyr.
