Qazaqstannyń bastamasy ıÝNESKO tarapynan qoldaý tapty
ASTANA. KAZINFORM — Qazaqstandyq delegatsııa Parıjde ıÝNESKO-nyń Atqarýshy keńesiniń kezekti 224-shi sessııasyna belsendi qatysty, dep habarlaıdy QR SІM baspasóz qyzmeti.
Plenarlyq otyrysta sóz sóılegen Qazaqstannyń ıÝNESKO janyndaǵy Turaqty ókili Asqar Abdrahmanov Uıymnyń jańa Bas dırektory Haled ál-Ananı bastamashylyq etken «ıÝNESKO-80» reformasyn joǵary baǵalady. Ol bul úderistiń múshe memlekettermen, ulttyq komıssııalarmen jáne uıymnyń ózge de qurylymdarymen ózara is-qımyldy kúsheıtýge baǵyttalǵanyn atap ótti. Sonymen qatar Astanada ótken Óńirlik ekologııalyq sammıtke kórsetilgen qoldaý men aldaǵy «Altyn Orda – dala órkenıetiniń úlgisi» halyqaralyq sımpozıýmyna berilgen patronaj úshin ıÝNESKO-ǵa alǵys bildirildi.
Sessııa aıasynda ulttyq komıssııalardyń dástúrli otyrysy ótip, onda QR ıÝNESKO jáne ISESKO isteri jónindegi Ulttyq komıssııasynyń Bas hatshysy Janar Shaımenova sóz sóıledi. Ol uıymdaǵy jańa bastamalardy qoldaı otyryp, bilim berý, ǵylym, mádenıet, kommýnıkatsııa jáne aqparat salalaryndaǵy halyqaralyq yntymaqtastyqty damytýda tıimdi áriptestiktiń mańyzyn atap ótti.
Sessııanyń negizgi nátıjeleriniń biri – Qazaqstan bastamashylyq etken «ıÝNESKO qaýymdastyqtary men klýbtarynyń Uıym baǵdarlamalary men jahandyq basymdyqtaryn iske asyrýǵa qosatyn úlesin kúsheıtý» týraly sheshimniń qabyldanýy boldy. Qujatty álemniń ártúrli óńirinen 41 memleket birlesip qoldady.
Qabyldanǵan sheshim ıÝNESKO klýbtary men qaýymdastyqtarynyń qyzmetin úılestirýdi kúsheıtip, olardy uıymnyń strategııalyq baǵyttaryn ilgeriletýge keńinen tartýǵa baǵyttalǵan. Bul bastama BUU-nyń 2026 jyldy Ornyqty damý maqsattary úshin Halyqaralyq eriktiler jyly dep jarııalaýymen de úndesedi.
Sondaı-aq Atqarýshy keńes Almatyda ótken ıÝNESKO klýbtarynyń Ǵalamdyq jastar forýmynyń qorytyndylaryn jáne 2030 jylǵa deıingi damý Jol kartasyn maquldady. Aıta keteıik, Qazaqstan 2023–2027 jyldary ıÝNESKO klýbtarynyń Dúnıejúzilik federatsııasyna tóraǵalyq etedi.
Búginde 95 elde 5 400-den astam bastamany biriktiretin ıÝNESKO klýbtary qozǵalysy jastar shyǵarmashylyǵyn damytýǵa, mádenıetaralyq dıalogty ilgeriletýge, ınklıýzıvti bilim berýdi qoldaýǵa jáne ekologııalyq sanany qalyptastyrýǵa baǵyttalǵan.
Qazaqstanda bul qozǵalys 2009 jyly qurylǵan ulttyq federatsııa aıasynda damyp keledi. Qazirgi tańda ol elimizdiń túrli óńirlerindegi 236 klýbty biriktirip, jyl saıyn 15 myńnan astam jasóspirim men stýdentti qamtıdy.
Osydan buryn ıÝNESKO-nyń «Álem jady» baǵdarlamasyna Qazaqstannan qandaı muralar usynylǵanyn jazǵanbyz.
