Qazaqstannyń basym bóliginde jańbyr men burshaq jaýady
ASTANA. KAZINFORM – Sınoptıkterdiń 20 tamyzǵa arnalǵan qaýipti meteorologııalyq qubylystarǵa boljamy jarııalandy.
Qazgıdromet málimetinshe, soltústik-batys tsıklony jáne onymen baılanysty atmosferalyq fronttar Qazaqstannyń soltústigine, soltústik-batysyna jáne ortalyq óńirlerine óz yqpalyn saqtaıdy. Bul aımaqtarda naızaǵaıly jańbyr jaýyp, soltústik pen soltústik-batysta burshaq túsýi múmkin.
- Respýblıkanyń batysynda, ońtústiginde jáne shyǵysynda antıtsıklonnyń áserinen jaýyn-shashynsyz aýa raıy kútiledi. El aýmaǵy boıynsha jel kúsheıedi. Soltústik, batys jáne ortalyq óńirlerde túnde jáne tańerteń tuman tússe, ońtústikte shańdy daýyl turady,. - delingen aqparatta.
Almaty oblysynyń ońtústik-shyǵysynda, Jetisý oblysynyń shyǵysynda, Ulytaý oblysynyń shyǵysynda, Atyraý oblysynyń soltústigi men ońtústiginde, sondaı-aq Batys Qazaqstan oblysynyń ońtústik-batysynda órt qaýpi joǵary bolady dep kútilýde.
Sonymen qatar Túrkistan, Qyzylorda, Mańǵystaý, Jambyl oblystarynda, Batys Qazaqstan oblysynyń batysynda, Almaty oblysynyń shyǵysy men batysynda, Atyraý oblysynyń batysy men shyǵysynda, Qostanaı, Qaraǵandy jáne Aqtóbe oblystarynyń ońtústiginde tótenshe órt qaýpi kútiledi.