Qazaqstannyń basym bóliginde daýyldy eskertý jarııalandy

ASTANA. KAZINFORM — 25 tamyzda Qazaqstannyń 16 óńirinde qatty jel soǵyp, órt qaýpi joǵary bolady dep boljanyp otyr. Bul týraly «Qazgıdromet» RMK málimdedi.

 

Aqmola oblysynda 25 tamyz kúni túnde jáne tańerteń batysynda, soltústiginde jáne shyǵysynda tuman kútiledi.

Almaty oblysynda 25–29 tamyz aralyǵynda joǵary órt qaýpi saqtalady. Oblystyń soltústigi men batysynda órt qaýpi óte joǵary deńgeıde.

Túrkistan oblysynyń soltústiginde shańdy daýyl boljanýda. Soltústik-shyǵystan soqqan jel oblystyń soltústigi, batysy jáne taýly aımaqtarynda 15–20 m/s deıin kúsheıedi. Órt qaýpi óte joǵary deńgeıde saqtalady.

Jetisý oblysynda soltústik-shyǵystan soǵatyn jel oblystyń shyǵysy men soltústiginde 15–20 m/s kúsheıedi. Ońtústigi, shyǵysy jáne soltústiginde órt qaýpi joǵary.

Ulytaý oblysynyń shyǵysynda da órt qaýpi joǵary deńgeıde.

Qaraǵandy oblysynda dúısenbi kúni ońtústiginde óte joǵary órt qaýpi saqtalady.

Batys Qazaqstan oblysynda batys, soltústik jáne ortalyq bólikterinde qatty jańbyr, burshaq, ekpindi jel (shkval) kútiledi. Naızaǵaı bolady. Jel ońtústik jáne ońtústik-shyǵystan 15–20 m/s deıin kúsheıedi. Oblystyń ońtústik-batysynda órt qaýpi joǵary, al batysynda óte joǵary.

Atyraý oblysynda dúısenbi kúni batysy men soltústiginde naızaǵaı, burshaq jáne ekpindi jel bolady. Kúndiz oblystyń shyǵysynda shańdy daýyl kútiledi. Jel baǵyty kúndiz ońtústik-shyǵystan ońtústik-batysqa aýysa otyryp, 15–20 m/s deıin kúsheıedi. Aýa temperatýrasy +31…+36°S deıin ysıdy. Batysy men shyǵysynda óte joǵary órt qaýpi, ortalyǵynda joǵary deńgeıde.

Shyǵys Qazaqstan oblysynyń soltústigi men shyǵysynda naızaǵaı, túnde jáne tańerteń tuman kútiledi. Kúndiz oblystyń batysy, soltústigi jáne ońtústiginde soltústik-batys jeli 15–20 m/s deıin jetedi. Soltústik, ońtústik-shyǵys jáne ortalyq bólikterinde órt qaýpi joǵary.

Abaı oblysynda dúısenbi kúni túnde jáne tańerteń soltústik pen ortalyqta tuman kútiledi. Jel soltústik jáne soltústik-shyǵystan kúndiz oblystyń ońtústik-batysy, shyǵysy jáne ortalyǵynda 15–20 m/s deıin kúsheıedi. Ortalyqta jáne oblystyń batysy men ońtústiginde órt qaýpi joǵary.

Qyzylorda oblysynyń shyǵysynda shańdy daýyl boljanýda. Kúndiz shyǵysynda jel 15–20 m/s deıin kúsheıedi.

Jambyl oblysynda jel soltústik-shyǵystan soǵady. Ońtústik-batysy, soltústik-shyǵysy jáne taýly aýdandarynda jeldiń jyldamdyǵy 15–20 m/s deıin jetedi. Oblysta óte joǵary órt qaýpi saqtalady.

Pavlodar oblysynyń batysy, soltústigi jáne shyǵysynda túnde jáne tańerteń tuman kútiledi.

Qostanaı oblysynda dúısenbi kúni túnde jáne tańerteń soltústigi men shyǵysynda tuman bolady. Ońtústiginde óte joǵary órt qaýpi saqtalady.

Soltústik Qazaqstan oblysynda túnde jáne tańerteń batysy, soltústigi men ońtústiginde tuman túsedi.

Mańǵystaý oblysynda dúısenbi kúni kúndiz soltústik-batysynda ońtústik-shyǵystan soǵatyn jeldiń ekpini 15–18 m/s bolady.

Aıta keteıik, frontaldy bólinisterdiń ótýine baılanysty elimizdiń batysynda, shyǵysynda, ońtústik-shyǵysynda jańbyr jaýyp, naızaǵaı oınaıdy, burshaq jaýyp, jeldiń kúsheıýi yqtımal ekenin jazǵan edik.