Qazaqstannyń básekege qabilettiligi artyp keledi – saıasattanýshy
ASTANA. KAZINFORM – Saıasattanýshy Ǵazız Ábishev Qazaqstan ekonomıkasynyń jahandyq básekege qabilettilik reıtıngindegi kórsetkishiniń jaqsarýyna áser etken faktorlar týraly aıtty.
Buǵan deıin Shveıtsarııanyń IMD bıznes-ınstıtýty Qazaqstandy álemdik ekonomıkalardyń halyqaralyq básekege qabilettilik reıtınginde 34-orynǵa qoıǵan.
Sarapshy Qazaqstan ekonomıkasynyń damýyn halyqaralyq profıldik ınstıtýttar qalaı baǵalaıtynyn taldady.
— Barlyǵy reıtıngke 69 el engen. Kósh basynda — Shveıtsarııa (1), Sıngapýr (2), Gonkong (3), Danııa (4) jáne Birikken Arab Ámirlikteri (5). Jalpy, bul bilim men tehnologııaǵa pragmatıkalyq túrde ınvestıtsııa salyp, bızneske qolaıly jaǵdaı jasaıtyn, qoǵamynyń alýan túrliligin oryndy qabyldaıtyn memleketter. Biz umtylýymyz qajet baǵyt osy elderdiń úlgisi, muny men birneshe jyldan beri aıtyp kelemin, — dedi Ǵazız Ábishev.
Reıtıngte Lıtva — 21-orynda, Estonııa — 33-te, Latvııa — 38-orynda tur.
— Eýrazııalyq keńistikten reıtıngke engen jalǵyz el — Qazaqstan, ol 34-orynda. 2022 jyly elimiz 43-orynda bolsa, 2023 jyly — 37-ge, 2024 jyly — 35-ke kóterildi. Al 2025 jyly — 34-orynǵa shyqty. Nege bulaı? Zertteýshiler halyqaralyq saýdadaǵy qıyndyqtardy (sanktsııalyq qarsy turý men jahandyq saýda soǵystarynyń áseri) jáne baǵa deńgeıin (ınflıatsııany) atap ótedi. Alaıda olar ishki ekonomıkalyq ósimdi jáne jumyspen qamtý boıynsha jaǵdaı jaqsy ekenin moıyndaıdy, — dep túsindirdi saıasattanýshy.
Ǵazız Ábishevtiń pikirinshe, munda demografııalyq faktor da esepke alynady. Qazaqstan halqy shamadan tys kóp emes jáne qalypty qarqynmen ósip keledi. Memlekettik qaryzdyń deńgeıi ortasha, al negizgi basymdyqtar ındýstrııalandyrý men ınfraqurylym, tsıfrlandyrý, tehnologııalar jáne áleýmettik júktemeni azaıtý bolyp otyr. Buǵan qosa — oılastyrylǵan syrtqy saıasat.
Sonymen qatar saıasattanýshy shveıtsarııalyq sarapshylardyń elimizdiń salyq saıasatyn joǵary baǵalaıtynyn, biraq jaýapty ınstıtýttardyń tıimdiligine ázirge saqtyqpen qaraıtynyn aıtty.
— Tipti bul reıtıngke kúmánmen qarap, ony belgili bir dárejede avans retinde qabyldaǵannyń ózinde, ol báribir oń sıgnal beredi. Qazaqstannyń básekege qabiletti elderdiń qataryna qosylý múmkindigi bar ekenin kórsetedi. Eń bastysy bilikti kadrlardy saqtap, kóbeıtý, naqty maqsat qoıý jáne olardy júıeli túrde oryndaý, — dep túıindedi ol.
Buǵan deıin halyqaralyq sarapshy, Cambrian Futures jahandyq jelisiniń bas dırektory Olaf Dj. Grot Qazaqstannyń jasandy ıntellekt boıynsha álemdik jarysta qandaı oryn alýy múmkin ekeni týraly pikir bildirgen edi.