Qazaqstannyń barlyq óńirinen 500 bala Astanaǵa áleýmettik týrmen keledi
ASTANA. KAZINFORM — Elordada «Astana — meniń Otanymnyń elordasy» áleýmettik týry bastaldy. Joba aıasynda elimizdiń barlyq óńirinen 500 bala elordaǵa keledi, dep habarlaıdy qala ákimdiginiń resmı saıty.
Jobany Astana qalasy ákimdiginiń qoldaýymen «Astana Tourism» týrızmdi damytý ortalyǵy» JShS uıymdastyryp otyr.
23 shildede týrdyń alǵashqy qatysýshylary retinde Atyraý oblysynan kelgen 40 oqýshy elordaǵa taban tiredi.
Qatysýshylar úshin kásibı gıdterdiń kómegimen úsh kúnge josparlanǵan mazmundy mádenı-tanymdyq, oıyn-saýyq jáne ekskýrsııalyq baǵdarlama ázirlengen.
— Jobanyń maqsaty — balalardyń Astana týraly tanymyn keńeıtip, olardy otansúıgishtikke, týǵan elge qurmet pen súıispenshilikke tárbıeleý. Sonymen qatar Qazaqstannyń tarıhy, mádenıeti men jetistikteri týraly bilimderin tereńdetip, bilim alýǵa jáne ózin-ózi damytýǵa yntalandyrý. Baǵdarlama aıasynda qatysýshylar elordanyń basty kórikti jerlerin aralaıdy. Olardyń qatarynda «Báıterek» monýmenti, Qazaqstan temir joly mýzeıi, Qazaqstan Respýblıkasynyń Ulttyq mýzeıi jáne basqa da nysandar bar, — delingen habarlamada.
Sonymen qatar balalardyń bos ýaqytyn tıimdi uıymdastyrýǵa erekshe kóńil bólingen. Olar okeanarıýmǵa, «Kango» batýt saıabaǵyna, «Leonardo da Vınchı» kórmesine, «Djýnglı» oıyn-saýyq saıabaǵyna baryp, Esil ózenimen teplohodta serýendeıdi.
Bul joba ishki balalar týrızmin damytýǵa jáne óskeleń urpaqtyń týǵan eline degen súıispenshiligin arttyrýǵa yqpal etedi.
Aıta keteıik, áleýmettik týr jaz mezgiliniń sońyna deıin jalǵasady. Oǵan Qazaqstannyń ár óńirinen kelgen balalar qatysady.
Budan buryn Astanadaǵy «Bolashaq oıyndary — 2026» týrnırine 50-den asa elden adam keletinin jazǵanbyz.
