Qazaqstannyń barlyq óńiri boıynsha aýa raıyna baılanysty eskertý jarııalandy

ASTANA. KAZINFORM – Sınoptıkter Qazaqstannyń 17 óńiri boıynsha aýa raıyna baılanysty eskerrtý jasady.

«Qazgıdromet» RMK-sy taratqan málimetterge qaraǵanda, Astanada 29 qańtarǵa qaraǵan túni jáne tańerteń tuman túsedi.

Aqmola oblysynyń batysynda, ońtústiginde jáne shyǵysynda tuman túsedi. Oblystyń soltústiginde ońtústik-batystan soqqan jeldiń ekpini sekýndyna 15–20 metrge deıin jetýi múmkin.

Mańǵystaý oblysynyń soltústik-shyǵysynda jáne ortalyǵynda kóktaıǵaq pen tuman boljanyp otyr. Jel ońtústik-shyǵystan soǵady, oblystyń batysynda, ońtústiginde jáne ortalyǵynda jeldiń ekpini 15–20 m/s-qa deıin kúsheıedi.

Atyraý oblysynyń batysynda azdaǵan qar jaýyp, jaıaý burqasyn men kóktaıǵaq bolady. Túnde jáne tańerteń oblystyń batysy men ońtústiginde tuman túsedi. Shyǵys jáne ońtústik aýdandarda ońtústik-shyǵystan soqqan jeldiń ekpini 15–20 m/s-ke jetedi.

Aqtóbe oblysynyń ońtústiginde, shyǵysynda jáne ortalyǵynda kúndiz tuman túsedi.

Abaı oblysynyń soltústiginde, ońtústiginde jáne ortalyq bóliginde tuman túsedi.

Almaty oblysynyń ońtústiginde jáne taýly aımaqtarynda keı ýaqytta tuman túsedi. Oblystyń shyǵysynda soltústik-shyǵystan soqqan jel ońtústik-shyǵysqa aýysyp, ekpini 15–20 m/s-qa deıin jetýi yqtımal.

Batys Qazaqstan oblysynyń batysy men ońtústiginde tuman túsedi. Soltústik jáne shyǵys aýdandarda ońtústik-shyǵystan soqqan jeldiń ekpini 15–20 m/s bolady.

Shyǵys Qazaqstan oblysynyń soltústiginde, ońtústiginde jáne ortalyǵynda tuman túsedi.

Pavlodar oblysynyń soltústigi men shyǵysynda tuman túsedi.

Qaraǵandy oblysynyń batysynda, soltústiginde jáne shyǵysynda tuman túsedi.

Qostanaı oblysynyń batysy men soltústiginde azdaǵan qar jaýyp, jaıaý burqasyn soǵady. Shyǵysy men ońtústiginde tuman túsedi. Kúndiz oblystyń batysy men soltústiginde ońtústik-batystan soqqan jeldiń ekpini 15–20 m/s bolady.

Ulytaý oblysynyń soltústiginde, shyǵysynda jáne ortalyǵynda tuman túsedi.

Jambyl oblysynyń batysynda, ońtústiginde jáne taýly aımaqtarynda túnde qar jaýyp, jaıaý burqasyn bolady. Kúndiz taýly jáne taý etegindegi aýdandarda qar men jaıaý burqasyn saqtalady. Keı jerlerde tuman túsip, kóktaıǵaq bolady. Jel túnde taýly aýdandarda soltústik-shyǵystan, kúndiz oblystyń ońtústik-batysynda, soltústik-shyǵysynda jáne taýly aımaqtarynda 15–20 m/s-qa deıin kúsheıedi.

Qyzylorda oblysynyń ortalyǵynda jáne ońtústiginde túnde azdaǵan qar jaýyp, kóktaıǵaq bolady. Oblystyń ortalyǵynda, ońtústiginde jáne soltústiginde tuman men jaıaý burqasyn kútiledi.

Túrkistan oblysynyń batysynda, soltústiginde, ońtústiginde jáne taýly aımaqtarynda qar jaýyp, jaıaý burqasyn, kóktaıǵaq pen tuman kútiledi. Soltústik jáne taýly aýdandarda soltústik-shyǵystan soqqan jeldiń ekpini 15–20 m/s bolady.

Soltústik Qazaqstan oblysynyń batysynda jáne soltústiginde azdaǵan qar jaýyp, jaıaý burqasyn soǵady. Oblystyń ońtústiginde tuman kútiledi. Túnde oblystyń batysynda, soltústiginde jáne ońtústiginde, al kúndiz jalpy óńirde ońtústik-batystan soqqan jeldiń ekpini 15–20 m/s-qa deıin jetedi.

Osyǵan deıin kún buzylyp, eki oblysta jol jabylǵany týraly jazdyq.