Qazaqstannyń barlyq aýylynda tabysty kooperatıvter qurýǵa negiz bar - depýtat

ASTANA. KAZINFORM - Qazaqstanda aýyl sharýashylyǵy salasy – strategııalyq mańyzdy baǵyttardyń biri. Memleket sońǵy jyldary bul salany damytýǵa aıryqsha kóńil bólip keledi. Bul týraly Parlament Májilisiniń depýtaty Aıdarbek Qojanazarov aıtty.

- Prezıdenttiń búgingi suhbatynda aıtqanyndaı, aýyl sharýashylyǵyna kórsetilip jatqan qoldaý kólemi ósip, egin sharýashylyǵy aıtarlyqtaı nátıjelerge jetti. Astyq pen un eksporty rekordtyq deńgeıge kóterilip, ónim jetkiziletin elderdiń geografııasy keńeıdi.

Degenmen, tek qomaqty qarjy bólý jetkiliksiz. Qoldaýdyń tıimdiligin arttyrý, mal sharýashylyǵyn damytý jáne sharýashylyqtardy kooperatsııa arqyly biriktirý mańyzdy.

Prezıdent atap ótkendeı, Qazaqstan mal ónimderin óndirý jáne eksporttaý áleýetine ıe. Álemde et tutyný ósip, ımport kólemi artatynyn eskere otyryp, Qazaqstan Azııa naryǵyna iri et eksporttaýshyǵa aınalý múmkindigi bar, - dedi depýtat.

Onyń paıymynsha, kooperatsııany damytý – aýyl sharýashylyǵynyń sapalyq ósimine, shaǵyn jáne orta sharýashylyqtardyń turaqty damýyna baǵyttalǵan durys strategııa.

- Bul eńbek ónimdiligin arttyryp, óńdelgen ónimdi naryqqa shyǵarý men uzaq merzimdi seriktestik ornatýǵa múmkindik beredi. Qarajattyń durys ári maqsatty jumsalýy, sondaı-aq sharýalarǵa jaǵdaı jasaý – saladaǵy basty mindetterdiń biri.

Qazaqstannyń barlyq aýylynda tabysty kooperatıvter qurýǵa negiz bar, jáne bul baǵytta túsindirý men uıymdastyrý jumystary kúsheıtilýi tıis. Bul tek ekonomıka úshin ǵana emes, aýyl turǵyndarynyń turmys sapasyn jaqsartýǵa da jol ashady, - dedi Aıdarbek Qojanazarov.

Aıta keteıik, búgin Turkistan» gazetinde Memleket basshysy Qasym-Jomart Toqaevtyń atalǵan basylymnyń bas redaktory, belgili aqyn, pýblıtsıst Baýyrjan Babajanulyna bergen keń kólemdi suhbaty jarııalandy.