Qazaqstannyń bank naryǵy: shaǵyn bankterge arnalǵan jańa lıtsenzııalaý júıesi engizildi
ASTANA. KAZINFORM — Qazaqstanda bankterdi lıtsenzııalaýdyń eki deńgeıli júıesi engizildi. Bul jańalyq shaǵyn bankter men mıkroqarjy uıymdary úshin ıkemdi jáne básekege qabiletti orta qurýǵa múmkindik beredi. Bul týraly Qarjy naryǵyn retteý jáne damytý Agenttigi Tóraǵasynyń orynbasary Dáýren Sálimbaevtyń maqalasynda aıtyldy.
Jańa júıe qarjylyq qyzmetterdiń qoljetimdiligin arttyrýǵa, kásipkerlikti damytýǵa jáne aýmaqtyq ári tsıfrlyq alshaqtyqtardy qysqartýǵa baǵyttalǵan.
— Bank naryǵyna qol jetkizý modelin jańartpaı tsıfrlandyrý múmkin emes. Jańa zańnyń negizgi jańalyqtarynyń biri bankterdi lıtsenzııalaýdyń eki deńgeıli júıesin engizý boldy: bazalyq jáne ámbebap lıtsenzııalar. Bul model tek iri bankter ǵana emes, sonymen qatar jańa qatysýshylar, sonyń ishinde shaǵyn óńirlik bankter men mıkroqarjy uıymdary damı alatyn barynsha ıkemdi jáne básekege qabiletti ortany qurýǵa múmkindik beredi. Bul ásirese qarjylyq qyzmetterdiń qoljetimdiligin yntalandyrý, kásipkerlikti damytý jáne banktik qyzmet kórsetýde aýmaqtyq jáne tsıfrlyq alshaqtyqtardy qysqartý úshin asa mańyzdy, — delingen maqalada.
Bazalyq lıtsenzııa shekteýli operatsııalar tizbesine baǵdarlanǵan shaǵyn bankterge arnalǵan. Mundaı uıymdar úshin eń tómengi kapıtal boıynsha ońaılatylǵan talaptar jáne qyzmet túrlerine shekteý kózdelgen. Atap aıtqanda, úlestes tulǵalar men beırezıdentterge kredıt berýge tyıym salynady, táýekeldi ınvestıtsııalar men iri mámileler kólemi shekteledi, jeke tulǵalardyń depozıtterin tartýǵa lımıt belgilenedi. Bul shekteýler qatysýshylarǵa artyq retteýshi júktemeni artpaı, yqtımal táýekelderdi azaıtýǵa múmkindik beredi.
Bul rette bazalyq lıtsenzııanyń bolýy mundaı bankterdi qadaǵalaý talaptarynan bosatpaıdy. Olar turaqty tekserýlerden ótedi, sonyń ishinde SREP — Supervisory Review and Evaluation Process qadaǵalaý modeli boıynsha ornyqtylyqty baǵalaý rásiminen ótedi. Bul táýekelderdi, korporatıvtik basqarýdy, kapıtaldyń jetkiliktiligin jáne basqa kórsetkishterdi qamtıtyn banktiń ornyqtylyǵyn baǵalaýdyń keshendi ádistemesi. Osylaısha, jańa qatysýshylardyń senimdiligi men adaldyǵy ámbebap banktermen qatar, biraq olardyń qyzmetiniń aýqymyn eskere otyryp qamtamasyz etiledi.
Ámbebap lıtsenzııa jumys istep turǵan iri bankter úshin saqtalady jáne klassıkalyq kredıt berýdenn bastap ınvestıtsııalyq qyzmet kórsetýge deıingi operatsııalardyń barlyq aıasyn júzege asyrýǵa múmkindik beredi. Bul tásil bir jaǵynan, básekelestikti arttyrýǵa jáne jańa oıynshylardy tartýǵa, ekinshi jaǵynan, júıeniń turaqtylyǵyn saqtaýǵa jáne operatsııalardyń sıpaty men kólemine baılanysty talaptardy saralaýǵa múmkindik beredi.
Shaǵyn, biraq turaqty bankterdiń paıda bolýyna jaǵdaı jasaý qarjylyq ınklıýzııany arttyrý, jańa bıznes-modelderdiń, sonyń ishinde tsıfrlyq modelderdiń paıda bolýy jáne básekelestik ortanyń jalpy qalpyna kelýi úshin mańyzdy qadam bolyp tabylady. Bolashaqta bul klıentterge — jeke tulǵalarǵa, sol sııaqty shaǵyn jáne orta bızneske banktik ónimderdi keńinen tańdaýǵa, onyń ishinde ınnovatsııalyq tehnologııalardy paıdalana otyryp alýǵa múmkindik beredi.
Aıta keteıik, elde kepilsiz tutynýshylyq qaryz berýge shekteý engiziledi.