Qazaqstannyń avıatsııalyq qaýipsizdik boıynsha IKAO standartyna sáıkestigi 95,7%-ǵa jetti
ACTANA. KAZINFORM – Halyqaralyq Azamattyq avıatsııa uıymy (IKAO) 2025 jylǵy 30 tamyzdan 15 qyrkúıekke deıin Qazaqstan Respýblıkasynda ótkizilgen avıatsııalyq qaýipsizdiktiń keshendi aýdıtiniń (USAP-CMA) nátıjelerin resmı túrde jarııalady.
Tekserý qorytyndysy boıynsha Qazaqstan Respýblıkasynda IKAO halyqaralyq standarttaryna sáıkestik deńgeıi 95,7% boldy. Bul kórsetkish álemdik ortasha deńgeıden (72,01) jáne Eýropa elderiniń kórsetkishinen (87,92%) joǵary.
QR Azamattyq avıatsııa komıteti málimetine boıynsha, Qazaqstannyń nátıjesi TMD elderi men IKAO-nyń Eýro-Azıattyq (EUR/NAT) aımaǵy boıynsha eń joǵary kórsetkishterdiń biri bolyp sanalady.
Salystyrmaly túrde: Ázerbaıjan - 74,66% Ózbekstan - 85,47% Qyrǵyzstan - 85,76% Grýzııa - 89,75% Belarýs - 91,85% Reseı - 94,14% Taıaý óńirlerde osyndaı kórsetkishter tómendegi elderde baıqalady: BAÁ - 98,4%, Katar - 96,72%, Saýd Arabııasy - 94,41%.
Qazaqstannyń avıatsııalyq qaýipsizdik boıynsha aldyńǵy kórsetkishi 83% bolatyn. Qazirgi kórsetkish avıatsııalyq qaýipsizdik salasyndaǵy negizgi zańnama, avıatsııalyq qaýipsizdik baǵdarlamalary men erejeleri, avıatsııalyq qaýipsizdik salasyndaǵy ýákiletti organ jáne onyń mindetteri, personaldyń biliktiligi men oqytylýy, tehnıkalyq usynymdar, quraldar jáne qaýipsizdik úshin mańyzdy aqparat berý, sertıfıkattaý jáne bekitý jónindegi mindettemeler, sapany baqylaý boıynsha mindettemeler, qaýipsizdik máselelerin sheshý sııaqty avıatsııalyq salanyń mańyzdy elementteri boıynsha qaýipsizdiktiń joǵary deńgeıiniń kórinisi.
Osy kórsetkishterdiń sáıkestigi qazaqstandyq áýejaılardyń qaýipsizdiginiń joǵary deńgeıin kórsetedi, bul áýe kompanııalar tarapynan senimniń ósýine, sondaı-aq AQSh-qa tikeleı reısterdi ashý úshin ushýlardyń birinshi sanatyn alýǵa yqpal etedi.
IKAO-nyń joǵary baǵasy elimizdiń avıatsııalyq salasynda 2019 jyldan bastap iske asyrylǵan keshendi reformalardyń, Qazaqstannyń avıatsııalyq ákimshiligin damytýdyń, mamandardyń biliktiligin arttyryp, táýekelge baǵdarlanǵan baqylaý tetikterin engizýdi qosa alǵanda, bıik nátıjelerdiń kórsetkishi. Sondaı-aq bul Qazaqstannyń jahandyq avıatsııalyq qaýipsizdik júıesine joǵary ıntegratsııalanýyn rastaıdy.
Aýdıt qorytyndysy –Qazaqstannyń jolaýshylar men avıatsııa ındýstrııasy úshin qaýipsiz jáne yńǵaıly áýe qatynasyn qamtamasyz etýge baǵyttalǵan halyqaralyq standarttarǵa beıildiliginiń mańyzdy dáleli.
Aıta keteıik, Qazaqstan IKAO Assambleıasynda 33 avıatsııalyq bastamany alǵash ret usyndy.