Qazaqstannyń aýyl sharýashylyǵy óniminiń Qytaıǵa eksporty 35% artty
ASTANA. KAZINFORM – Aýyl sharýashylyǵy mınıstri Aıdarbek Saparov Qazaqstandaǵy QHR-nyń Tótenshe jáne Ókiletti Elshisi Han Chýnlınmen kezdesý ótkizdi.
Mınıstrlik málimetinshe, kezdesý barysynda taraptar agrarlyq saladaǵy ekijaqty yntymaqtastyqtyń qazirgi jaǵdaıy men bolashaǵyn talqylady. Mınıstr aýyl sharýashylyǵy salasyndaǵy áriptestik turaqty oń dınamıkany kórsetip otyrǵanyn atap ótti.
2024 jyly eki el arasyndaǵy aýyl sharýashylyǵy ónimderiniń taýar aınalymy 10% ósip, 1,4 mlrd AQSh dollaryna jetti.
2025 jyldyń alǵashqy bes aıynda ósim 36% bolyp, 736,9 mln dollarǵa jetti. Qazaqstannan Qytaıǵa eksporttyń, sondaı-aq Qytaıdan ımporttyń da artýy agrarlyq saýdanyń teńgerimdi ári ózara tıimdi qurylymyna dálel bolyp otyr.
2024 jyldyń qorytyndysy boıynsha Qytaıǵa aýyl sharýashylyǵy ónimderiniń eksporty 1,1 mlrd AQSh dollaryn qurap, 4%-ǵa artty. Al 2025 jyldyń qańtar–mamyr aılarynda eksport 35%-ǵa ósip, 513,4 mln dollarǵa jetti. Negizgi eksporttyq pozıtsııalarǵa mal azyǵy (+485%, 1,2 mln tonna), ósimdik maılary (+26%, 173,3 myń tonna) jáne bıdaı kiredi.
– Biz úshin negizgi máselelerdiń biri – sıyr eti, qoı eti jáne qosalqy ónimderdi eksporttaýǵa qatysty jańartylǵan hattamalarǵa qol qoıý. 2025 jyldyń mamyr aıynda QHR-nyń Bas keden basqarmasymen Qazaqstandaǵy qyzylsha jomyn óndiretin kásiporyndarǵa birlesken ınspektsııa júrgizý, sondaı-aq Aqtóbe, Qaraǵandy, Shyǵys Qazaqstan jáne Abaı oblystaryn tekserý arqyly Qytaıǵa bıdaı men arpa jetkiziletin óńirlerdiń geografııasyn keńeıtý týraly kelisimge qol jetkizildi. Biz osy jyldyń tamyz aıynda qus sharýashylyǵy kásiporyndaryn QHR talaptaryna sáıkestigi turǵysynan tekserý júrgizýdi usynamyz, – dedi Aıdarbek Saparov.
Kezdesý barysynda ınvestıtsııalyq yntymaqtastyqqa erekshe nazar aýdaryldy. Qazirgi tańda Qazaqstanda Qytaı kapıtalynyń qatysýymen jalpy quny shamamen 2,8 mlrd AQSh dollaryn quraıtyn aýyl sharýashylyǵy salasyndaǵy 4 iri joba júzege asyrylyp jatyr. Bul Qytaı ınvestorlary tarapynan joǵary senimniń bar ekenin jáne strategııalyq áriptestikti tereńdetýge qosymsha yntalandyrý jasaıtynyn kórsetedi.
QHR-nyń Tótenshe jáne Ókiletti Elshisi Han Chýnlın eki el arasyndaǵy aýyl sharýashylyǵy salasyndaǵy ózara is-qımyl deńgeıiniń joǵary ekenin atap ótip, Qytaı tarapynyń ózara saýda kólemin arttyrýǵa jáne ınvestıtsııalar, sanıtarııalyq-veterınarııalyq baqylaý men agrarlyq ınnovatsııalar baǵytynda yntymaqtastyqty keńeıtýge múddelilik tanytyp otyrǵanyn jetkizdi.
Kezdesý sońynda taraptar agrarlyq saladaǵy jan-jaqty jáne ózara tıimdi yntymaqtastyqty odan ári damytýǵa daıyn ekenderin rastady.
Aıta keteıik, Qazaqstannyń 6 kompanııasy Iordanııaǵa qoı men sıyr etin eksporttaıdy.