Qazaqstannyń atynan óner kórsetetinimdi maqtan tutamyn – Rybakına
ASTANA. KAZINFORM – Qazaqstandyq tennısshi Elena Rybakına áıelder arasyndaǵy jekeleı synda álemniń birinshi raketkasy atanǵannan keıin málimdeme jasady.
US Open týrnırinde jýrnalısterge suhbat bergen Elena Rybakına Qazaqstan týraly aıtyp, óz sezimin bólisti.
Onyń aıtýynsha, bul jaı ǵana jeńis emes, Qazaqstan sporty úshin tarıhı ári maqtanyshqa toly sát.
Tennısshi Qazaqstanǵa ár saparynda eldiń qaı qalasyna barsa da, ony balalarǵa lyq toly tennıs korttary qarsy alatynyn jyly yqylaspen eske aldy.
– Seniń tutas bir urpaqqa shabyt berip jatqanyńdy kórý keremet sezim, – dedi Elena Rybakına.
Ol bul jaǵdaı kóp eńbektenseń, armandardyń oryndalatynynyń naqty dáleli ekenin aıtyp, týrnırlerge baılanysty elde jıi bola almasa da, Qazaqstanǵa oralýyn asyǵa kútetinin atap ótti. Ol ózin qoldap otyrǵan eline jeke ózi «raqmet» aıtqysy keledi. Tennısshi Qazaqstannyń qoldaýyn telefonyndaǵy quttyqtaýlardy ashyp úlgermeı jatyp-aq sezinetinin jetkizdi.
Keıin Rybakına Instagram paraqshasynda bul jeńisi týraly jazdy.
– Sizder senseńizder, bári múmkin! Qazaqstannyń atynan óner kórsetetinimdi jáne osy eldiń atynan álemniń birinshi raketkasy atanyp, tarıh jasap jatqanymdy maqtan tutamyn, – dep jazdy ol.
Buǵan deıin Prezıdent Elena Rybakınany álemniń birinshi raketkasy atanýymen quttyqtaǵan edi.
Sonymen qatar Elena Rybakına álemniń birinshi raketkasy atanǵanyn jazǵanbyz.
