Qazaqstannyń astyq pen un eksporty 12 mln tonnadan asty
ASTANA. KAZINFORM - «Qazaqstan temir joly» UK» AQ málimetterine sáıkes, 2025 jyldyń qyrkúıeginen 2026 jyldyń mamyryna deıingi kezeńde astyq pen undy eksporttaý astyq ekvıvalentinde 12,2 mln tonnaǵa jetti.
QR Aýyl sharýashylyǵy mınstrligi baspasóz qyzmetiniń habarlaýynsha, bul ótken maýsymnyń sáıkes kezeńimen salystyrǵanda 13%-ǵa artyq, ol kezde shetelge 10,7 mln tonna jóneltilgen.
Ósimniń negizgi draıverleri Ortalyq Azııa aımaǵyndaǵy dástúrli ımporttaýshy elder men Aýǵanstan boldy.
Atap aıtqanda, Ózbekstanǵa eksport 38%-ǵa ósip, 3,6 mln tonnadan 5 mln tonnaǵa jetti, Qyrǵyzstanǵa – 1,5 ese artyp, 312 myń tonnadan 474 myń tonnaǵa deıin ósti, Aýǵanstanǵa – 58%-ǵa kóbeıip, 1,3 mln tonnadan 2 mln tonnaǵa jetti. Túrikmenstan 197 myń tonna ımporttady, bul ótken jylǵy kórsetkishten 44%-ǵa joǵary (137 myń tonna).
-Júk tasymaly boıynsha oń statıstıka qazaqstandyq aýyl sharýashylyǵy ónimderine joǵary suranysty jáne ońtústik baǵyttaǵy logıstıkalyq dálizderdiń turaqty jumys isteýin rastaıdy, sondaı-aq eksporttyq logıstıkany damytý men sheteldik seriktestermen saýda-ekonomıkalyq yntymaqtastyqty keńeıtý boıynsha qabyldanyp jatqan sharalardyń tıimdiligin dáleldeıdi,-delingen habarlamada.
Osyǵan deıin Azyq-túlik kelisimshart korporatsııasynyń 47,5 mlrd teńgege 380 myń tonna astyq satqany týraly jazdyq.
