Qazaqstannyń astyq eksporty 11,7 mln tonnaǵa jetti
ASTANA. KAZINFORM — «Qazaqstan temir joly» UK» AQ málimetinshe, 2025 jylǵy qyrkúıekten 2026 jylǵy 20 mamyrǵa deıin astyq pen astyq balamasyndaǵy un eksportynyń kólemi 11,7 mln tonna boldy.
Bul ótken jyldyń osy kezeńimen salystyrǵanda 13,6%-ǵa joǵary (10,3 mln tonna).
Eksport kóleminiń ósýi Ortalyq Azııa elderi men Aýǵanstan baǵyttarynda baıqaldy. Atap aıtqanda, Ózbekstanǵa eksport 39,5%-ǵa artyp, 3,5 mln tonnadan 4,8 mln tonnaǵa jetti. Qyrǵyzstanǵa jetkizilim kólemi 1,5 esege ósip, 297 myń tonnadan 457 myń tonnaǵa deıin ulǵaıdy.
Sondaı-aq Aýǵanstan baǵyty boıynsha aıtarlyqtaı ósim tirkeldi, eksport kólemi 2,3 esege artyp, 1,3 mln tonnadan 3 mln tonnaǵa jetti. Túrikmenstanǵa eksport 47,7%-ǵa ulǵaıyp, 130 myń tonnadan 192 myń tonnaǵa deıin ósti.
Qarqyndy ósim qazaqstandyq astyq ónimderine syrtqy naryqtarda suranystyń joǵary ekenin, sondaı-aq eksporttyq logıstıkany damytý jáne sheteldik seriktestermen saýda-ekonomıkalyq yntymaqtastyqty keńeıtý baǵytynda qabyldanyp jatqan sharalardyń tıimdiligin kórsetedi.
Aıta ketelik Qazaqstan men Qytaı birlesken astyq saýda platformasyn qurǵany týraly jazǵan edik.
