Qazaqstannyń Áskerı-teńiz kúshteri kemelerdiń jaýyngerlik daıarlyǵyn synaqtan ótkizdi
ASTANA. KAZINFORM — Qazaqstan Respýblıkasy Qarýly kúshteriniń Áskerı-teńiz kúshterinde jerústi korablderi quramalarynyń, áskerı basqarý organdary men taktıkalyq toptardyń jaýyngerlik daıarlyǵyn jetildirýge baǵyttalǵan S kýrstyq tapsyrmasyn qabyldaý kezeńi aıaqtaldy.
Qorǵanys mınıstrliginiń habarlaýynsha, Ooý-jattyǵý aıasynda komandalyq-shtabtyq jattyǵýlar, shtabtyq oqý-jattyǵýlar jáne praktıkalyq sabaqtar uıymdastyryldy. Oǵan quramalar komandırleri, shtab ofıtserleri men keme ekıpajdary qatysyp, ózderine júktelgen mindetterdi oryndady.
Jattyǵý barysynda jaýyngerlik is-qımyldardy josparlaý men uıymdastyrý, kúshterdi basqarý, bólimsheler arasyndaǵy ózara is-qımyldy úılestirý, baılanys pen jan-jaqty qamtamasyz etý máseleleri pysyqtaldy.
«Mańǵystaý» zymyran-artıllerııalyq korabliniń komandıri, 3-dárejeli kapıtan Ermekbaı Ospanovtyń aıtýynsha, oqý kezinde áskerı basqarý organdarynyń ózgermeli jaǵdaıda jedel sheshim qabyldaý qabiletin jetildirýge, kemelerdiń taktıkalyq toptaryn turaqty basqarýǵa, qoldaý kúshterimen ózara is-qımyldy kúsheıtýge jáne qarý-jaraq pen tehnıkalyq quraldardy tıimdi paıdalanýǵa basymdyq berilgen.
— Kýrstyq tapsyrmanyń praktıkalyq kezeńi kemelerdiń turaqty ornalasý oryndarynda jáne teńiz polıgondarynda ótti. Teńizge shyǵý barysynda ekıpajdar taktıkalyq top quramynda birlesip júzý, baılanys pen basqarýdy uıymdastyrý, navıgatsııalyq qamtamasyz etý jáne ártúrli jaǵdaıda manevr jasaý boıynsha tapsyrmalardy oryndady, — dep habarlady vedomstvonyń baspasóz qyzmeti.
Qorytyndy baqylaý taktıkalyq oqý-jattyǵýy kezinde shtabtar men keme taktıkalyq toptarynyń kúshterdi basqarýǵa jáne qoıylǵan mindetterdi oryndaýǵa ázirligi tekserildi.
Oqý-jattyǵý nátıjesinde áskerı basqarý organdary men keme ekıpajdarynyń joǵary úılesimdiligi, komandalyq quramnyń kásibı daıarlyǵy, sondaı-aq kúrdeli jaǵdaıda jedel ári tıimdi sheshim qabyldaý qabileti rastaldy.
Eske salaıyq, buǵan deıin Qazaqstanda áskerı rezervtiń atys daıyndyǵy kúsheıtilgenin habarlaǵanbyz.
