Qazaqstannyń áskerı oqý oryndarynda jańa mamandyqtar paıda boldy

ASTANA. KAZINFORM – Elimizdiń áskerı oqý oryndarynda QR Qarýly Kúshterdiń qajettiligin óteý maqsatynda daıarlaý mamandyqtarynyń tizbesi edáýir keńeıtildi. Bul týraly QR Qorǵanys mınıstrligi Áskerı bilim jáne ǵylym departamentiniń bastyǵy Jumabek Ahmetov aıtyp berdi. 

«Áýe qorǵanys kúshteri áskerı ınstıtýtynda «Ushqyshsyz ushý apparatyn basqarý» mamandyǵy boıynsha kadr daıarlanady. Alǵash ret áskerı teńiz mamandyqtary boıynsha irikteý júrgiziledi. Radıoelektronıka jáne baılanys áskerı-ınjenerlik ınstıtýtyna «Radıoelektrondy barlaý jáne radıoelektrondy kúres», «Aqparattyq qorǵaý» jáne «Avtomattandyrylǵan basqarý júıeleri» mamandyqtary bolady», - dedi Jumabek Ahmetov Ortalyq kommýnıkatsııalar qyzmetinde ótken baspasóz máslıhatynda. 

Sonymen birge, Radıoelektronıka jáne baılanys áskerı-ınjenerlik ınstıtýtyna «Áskerı istegi Jýrnalıstıka jáne jurtshylyqpen baılanys» jáne «Áskerı istegi dırıjerlyq» jańa mamandyqtary boıynsha qabyldaý júrgizý josparlanyp otyr. 

«Otandyq oqý oryndarynda áskerı mamandardy daıarlaý mamandyqtarynyń spektrin ulǵaıtý arqyly shetelde áskerı kadrlardy daıarlaý 100-den 60-qa deıin qysqartyldy. Osylaısha, bizdiń áskerı bilim berý júıesi qalyptasty jáne zamanaýı talaptarǵa jaýap beredi», - dedi J. Ahmetov. 

Aıta keteıik, QR Qorǵanys mınıstrliginiń áskerı bilim berý júıesine 9 áskerı oqý orny kiredi. Orta bilim boıynsha 3 respýblıkalyq «Jas ulan» mektebi, Astana men Şýche qalalarynda 2 tehnıkalyq jáne kásiptik áskerı kolledj bar. 

Joǵary bilimde – Qurlyq áskerleriniń áskerı ınstıtýty, Áýe qorǵanys kúshteri áskerı ınstıtýty jáne Radıoelektronıka jáne baılanys áskerı-ınjenerlik ınstıtýty mamandardy daıarlaıdy. Al joǵary oqý ornynan keıingi (magıstratýra jáne doktorantýra) bilimde – Ulttyq qorǵanys ýnıversıteti bar.

Buǵan deıin spıker Qazaqstandaǵy áskerı oqý oryndaryna qujat qabyldaý merzimi uzartylǵanyn aıtqan edi.