Qazaqstannyń áskerı qyzmetshilerin áleýmettik qoldaý: 2025 jyly ne ózgerdi
ASTANA. KAZINFORM – 2025 jyl Qazaqstannyń áskerı qyzmetshilerin áleýmettik qamtamasyz etý júıesi úshin eń mazmundy ózgeristerge toly kezeńderdiń biri boldy. Qabyldanǵan sharalar aqshalaı úlespen qamtýdy, turǵyn úı máselelerin, bilim berý, otbasylardy qoldaý jáne qyzmet aıaqtalǵannan keıin azamattyq ómirge beıimdeýdi qamtydy. Bul týraly Qorǵanys mınıstrligi jazdy.
Negizgi qadamdardyń biri laýazymdyq jalaqylardyń ósýi boldy. 2025 jylǵy 1 qańtardan bastap ofıtserlik quramnyń jalaqysy orta eseppen 20,3 paıyzǵa, al qatardaǵy jáne serjanttyq quramdiki 33,9 paıyzǵa artty. Sonymen qatar buryn joıylǵan dalalyq tólemder júıesi qaıta engizildi. 1 shildeden bastap áskerı qyzmetshilerge dalalyq shyǵýlarǵa, teńiz joryqtaryna jáne oqý-jattyǵýlarǵa qatysqan árbir táýlik úshin issapar rásimdemeı-aq, 1,2 aılyq eseptik kórsetkish mólsherinde dalalyq tólemder tólene bastady.
Aldaǵy ýaqytta da qosymsha ózgerister josparlanǵan. 2026 jylǵy 1 qańtardan bastap eńbekaqy tóleýdiń jańa júıesi aıasynda jalaqyny arttyrýdyń ekinshi kezeńi iske asady. ıAǵnı, ofıtserler úshin taǵy 23 paıyzǵa, al qatardaǵy jáne serjanttyq quram úshin birinshi kezeń deńgeıinen 10 paıyzǵa ósirý kózdelgen.
Turǵyn úımen qamtamasyz etý salasy da eleýli túrde damydy. 2025 jyldyń 17 qarashasynan bastap «Otbasy bank» turǵyn úı tólemderin alatyn áskerı qyzmetshilerge arnalǵan arnaıy ıpotekalyq ónimderdi iske qosty. Bastapqy jarnasy 20 paıyzdyq «Áskerı baspana» baǵdarlamasy qaıtalama turǵyn úı naryǵynan baspana satyp alýǵa baǵyttalǵan. Aldyn ala qaryz boıynsha paıyzdyq mólsherleme jylyna 18 paıyz jáne turǵyn úı qunynyń 50 paıyzy jınaqtalǵan kezde 5 paıyzǵa tómendeıdi. «Naýryz áskerı» baǵdarlamasy bastapqy jarnasyz jańa qurylystan páter satyp alýǵa múmkindik beredi. Astana men Almaty qalalarynda qaryzdyń eń joǵary somasy 36 mln teńgege deıin, basqa óńirlerde 30 mln teńgege deıin, al bastapqy jarna 20 paıyzdan asqan jaǵdaıda 80 mln teńgege deıin jetedi. Qaryz boıynsha paıyzdyq mólsherleme jylyna 9 paıyzdy quraıdy.
2025 jyly áskerı qyzmetshilerdiń otbasylaryn qoldaýǵa da erekshe kóńil bólindi. Áskerı qyzmetshilerdiń myńnan astam balasy «Baldáýren» balalar saýyqtyrý ortalyǵynda demalyp, densaýlyqtaryn nyǵaıtty. Bul Qorǵanys mınıstrliginiń áleýmettik saıasatynyń mańyzdy bóligine aınaldy.
Sonymen qatar merzimdi áskerı qyzmettiń bedelin arttyrý jáne áleýmettik kepildikterdi keńeıtý jumystary jalǵasyp jatyr. Sarbaz 2.0 tsıfrlyq jobasy iske qosylǵaly beri 9 myńnan astam úzdik áskerı qyzmetshi bilim berý granttaryna ıe boldy. Onyń ishinde 3 000-nan astamy jataqhanaǵa basymdyqpen ornalastyrý jáne shákirtaqy tóleý qarastyrylǵan memlekettik granttar ekenin atap ótý kerek. El tarıhynda alǵash ret irikteý tolyq avtomattandyrylǵan formatta ótýde. Bul júıe sarbazdardyń reıtıngin tártip, dene daıyndyǵy jáne jaýyngerlik daıyndyq kórsetkishteri boıynsha qalyptastyrady. Al algorıtm granttardy tańdalǵan joǵary oqý oryndary men mamandyqtar arasynda ózdiginen bóledi.
Sarbazdar men olardyń otbasylaryna túsetin qarjylyq júkteme de azaıtyldy. 20 myńnan astam merzimdi áskerı qyzmetshi jalpy somasy shamamen 8 mlrd teńgeni quraıtyn «nesıelik demalysty» paıdalandy. Sonymen qatar qyzmet barysynda sarbazdar eńbek naryǵynda suranysqa ıe aýyr júk kóliginiń júrgizýshisi, ekskavatorshy, baılanys mamany, dızelıst-elektrık, paramedık jáne basqa da kásipter boıynsha jumysshy mamandyqtaryn tegin meńgere alady. Oqý aıaqtalǵan soń olarǵa sertıfıkattar beriledi.
Áleýmettik saıasattyń jańa baǵyty – áskerı qyzmetshilerdi qyzmetten keıingi ómirge daıarlaý. Qorǵanys mınıstrligi zeınetke shyǵar aldynda áskerı qyzmetshilerdi beıimdeý baǵdarlamasyn iske qosty. Endi olar áskerı joǵary oqý oryndarynyń bazasynda mektepterde alǵashqy áskerı daıyndyq páninen sabaq berý úshin, sondaı-aq áskerı kafedralarda jumysqa ornalasý maqsatynda tegin qaıta daıarlaýdan óte alady. Bul sheshim ofıtserlerdiń kásibı áleýetin saqtaýǵa jáne azamattyq qyzmetke birtindep kóshýine múmkindik beredi.
Eske salsaq, budan buryn Astanada Qorǵanys mınıstrliginiń áskerı gospıtali jańa jabdyqtarmen tolyqqanyn jazǵan edik.