Qazaqstannyń arnaıy jasaǵy álemdik dodada kúmis júlde aldy
ASTANA. KAZINFORM — Dýbaıda ótken «The UAE SWAT Challenge 2025» halyqaralyq jarysynyń jeńimpazdary elge oraldy.
Bes kún boıy ótken arnaıy jasaq olımpıadasyna álemniń túkpir-túkpirinen 100-den astam komanda qatysty.
Qazaqstannyń kúshtik qurylymdarynyń atynan 12 komanda baq synady.
— Sizder sheberlik, tózimdilik jáne naǵyz jaýyngerlik rýhty kórsettińizder. Eldiń týyn kókke kóterip, el namysyn arttyra bildińizder. Búkil álemdi moıyndattyńyzdar, biz sizderge qarap bir kúsh, bir judyryq ekenimizge taǵy kózimiz jetti. Qandaı qurylymda qyzmet etsek te mindet ortaq — eldiń qorǵany bolyp, qaýipsizdikti saqtaý, zań men tártipti ornatýǵa kúsh salý. Sizderge barlyq kúshtik qurylym jankúıer boldy, taqymyn qysty, búkil halyq bolyp jeńiske kýá boldyq. Jastar sizderge qarap boı túzedi, antqa berik boldy. Alǵash ret arnaıy jasaqtar qatarynda arýlarymyz qatysty, olar álemniń myqty jigitterimen birge synǵa tústi. Naǵyz sheberlik pen qaısarlyqtyń belgisin kórsetti. Bul naǵyz erlik. Qurmetti jaýyngerler, biz sizdermen maqtanamyz, árqashan, ár saıysta tek qana jeńis bolsyn, alǵa Qazaqstan!, — dedi Іshki ister mınıstri Erjan Sadenov arnaıy jasaq quramasyn saltanatty túrde qarsy alý barysynda.
Jarys barysynda álemniń úzdik jaýyngerleri shynaıy operatsııalar negizinde jasalǵan bes kúrdeli kezeńnen ótti.
— Jarys jyldan jylǵa jetildirilip jatyr, osal eshkim joq. Barsha Qazaqstan bizdiń jarysty qarady, qazaqqa qıyn eshteńe joq. Jigitti namys óltiredi, qazaq úshin, el úshin, bizdiń qyzmet úshin namysty bermeýge tyrystyq, úlken dárejege jettik, — dedi Іshki ister mınıstrliginiń arnaıy maqsattaǵy qyzmeti «A» jasaǵynyń múshesi Madııar Tileýlınov.
Osy oraıda jeńimpaz jerlesimiz qoldaý bildirgen barsha qazaqstandyqqa alǵys aıtty.
— Bizge mol tájirıbe berdi, óıtkeni jarysta praktıka, taktıka bári birge júredi. Bul arnaıy jasaqta júrgen qyzmetshi úshin mańyzdy. Jarysqa 3 aı daıyndaldyq, — deıdi ol.
Tartysty týrnırde qazaqstandyq komanda jedeldik, uıymshyldyq, dáldik jáne biliktilikterin kórsetti.
Іshki ister mınıstrliginiń «Suńqar» komandasy úsh kezeńde júldeli orynǵa ıe boldy, onyń ishinde 2 altyn júlde.
Jalpy kórsetkish boıynsha «Suńqar» saıypqyrandary jarystyń kúmis júldegeri atandy.
Dodanyń ekinshi kezeńinde memlekettik kúzet qyzmetiniń «Sardar A» komandasy «altyn» alsa, Ulttyq qaýipsizdik komıtetiniń «Arystan Team» komandasy eki kezeńde úzdik úshtikten kórindi.
Aıta keteıik, Іshki ister mınıstrligi qurylymyndaǵy «Tomiris» áıelder komandasy erlermen qatar álemdik jarysta el namysyn qorǵady.
Qazaqstandyq arýlar áıelder komandalary arasynda 2-shi orynǵa ıe boldy.
Buǵan deıin Qazaqstannyń kúshtik qurylymdarynyń arnaıy bólinisteri Dýbaıda «The UAE SWAT Challenge 2025» VI halyqaralyq jarystaryna qatysyp jatqany týraly habarlaǵan edik.