Qazaqstannyń arheologııalyq jádigerleri Parıjdegi kórmege qoıylady
ASTANA. KAZINFORM — Qazaqstan Respýblıkasynyń Ulttyq mýzeıinde Parıjdegi Adam mýzeıi men Frantsııanyń Qazaqstandaǵy elshiligi ókilderimen kezdesý ótti.
Taraptar 2027 jyly Parıjde ótetin «Tarıhqa deıingi dáýirdegi baılyq pen bılik» halyqaralyq kórmesine daıyndyq máselelerin talqylady.
Kórmege Adam mýzeıiniń, Frantsııa men Eýropanyń ózge elderindegi mýzeılerdiń kollektsııalary qoıylady. Qazaqstan atynan Ulttyq mýzeı qatysady. Kórmede Berel qorymynan tabylǵan biregeı arheologııalyq jádigerlerdi tanystyrý josparlanyp otyr.
Kezdesýde jádigerlerdi kórmege daıyndaý, olardyń saqtalýyn qamtamasyz etý jáne jobaǵa ǵylymı súıemeldeý júrgizý máselelerine aıryqsha mán berildi.
Mádenıet jáne aqparat mınıstrligi málimetinshe, bul kezdesý qyrkúıekte Parıjde ótken Qazaqstan kúnderi aıasynda qol jetkizilgen ýaǵdalastyqtyń jalǵasy boldy.
Ortaq joba mýzeıler arasyndaǵy áriptestikti nyǵaıtýǵa, mamandardyń tájirıbe almasýyna jáne Qazaqstannyń tarıhı-mádenı murasyn sheteldik jurtshylyqqa keńinen tanytýǵa baǵyttalǵan.
Aıta keteıik, Almatyda qazaq jáne qytaı sýretshileriniń týyndylary qoıylǵan halyqaralyq kórme ashyldy.
