Qazaqstannyń Araldy qutqarýǵa qatysty jospary usynyldy
ASTANA. KAZINFORM — Sý resýrstary jáne ırrıgatsııa mınıstriniń orynbasary Nurlan Aldamjarov Aral teńizin qutqarý boıynsha Qazaqstannyń basa nazar aýdaratyn úsh baǵytty atady.
— Araldy qutqarý jónindegi halyqaralyq qor Ortalyq Azııadaǵy negizgi óńirlik organdardyń biri. Qor qurylǵaly transshekaralyq sý resýrstaryn birlesip paıdalaný máselelerin retteýde, sondaı-aq Aral teńizi basseınindegi ekologııalyq jáne áleýmettik-ekonomıkalyq máselelerdi sheshýde óńirlik yntymaqtastyqtyń mańyzdy ınstıtýtyna aınaldy. Rotatsııa qaǵıdalaryna sáıkes 2024 jylǵy 1 qańtardan bastap Qazaqstan atalǵan qorǵa úsh jyl boıy tóraǵalyq etedi, — dedi Nurlan Aldamjarov dóńgelek ústelde.
Odan ári vıtse-mınıstr Araldy qutqarýǵa qatysty Qazaqstannyń tóraǵalyǵy aıasynda atqarylatyn jumys josparymen bólisti.
— Birinshiden, Ortalyq Azııanyń sý-energetıkalyq resýrstaryn tıimdi paıdalaný úshin barlyq eldiń múddesin eskere otyryp, ózara tıimdi jáne turaqty óńirlik yntymaqtastyq mehanızmin qurý kerek dep sanaımyz. Ekinshiden, Aral teńizi basseıninde sý resýrstaryn esepke alý men monıtorıng júrgizýdiń biryńǵaı avtomattandyrylǵan júıesin engizý jónindegi jumys josparyn ázirleý mańyzdy. Bul sýdy paıdalanýdyń ashyqtyǵyn qamtamasyz etip, Ortalyq Azııa elderi arasyndaǵy ózara senimdi nyǵaıtady. Úshinshiden, damý jónindegi halyqaralyq áriptestermen yntymaqtastyqty tereńdetý boıynsha sharalar qabyldaý qajet, sonyń ishinde Aral teńizi basseıni elderine kómek kórsetý jónindegi is-qımyl baǵdarlamasyn (PBAM-4) jáne Ortalyq Azııanyń turaqty damýy úshin qorshaǵan ortany qorǵaý jónindegi óńirlik baǵdarlamany (RPOOSÝR) iske asyrý boıynsha jumystardy jalǵastyrý qajet, — dep túsindirdi mınıstrdiń orynbasary.
Onyń aıtýynsha, atalǵan bastamalardy júzege asyrý ulttyq basymdyqtardy oryndaýǵa jáne óńirlik yntymaqtastyqty nyǵaıtýǵa yqpal etedi.
— Tek yntymaqtastyq arqyly ǵana óńirde sý, energetıkalyq jáne azyq-túlik qaýipsizdigin qamtamasyz ete alatynymyzǵa senimdimiz, — dep túıindedi N. Aldamjarov.
Aıta keteıik, elordada Birikken Ulttar Uıymynyń azyq-túlik jáne aýyl sharýashylyǵy uıymy (FAO) jáne elimizdiń Sý resýrstary jáne ırrıgatsııa mınıstrliginiń uıytqy bolýymen sý resýrstaryn turaqty basqarý máselelerine arnalǵan dóńgelek ústel ótti.
Eske sala keteıik, byltyr Memleket basshysy Qasym-Jomart Toqaev Túrki memleketterin Kaspıı jáne Aral teńizindegi ekologııalyq máseleni birigip sheshýge shaqyrdy.
Bıyl 19 aqpanda Májilistiń qaraýyna Aral teńiziniń jer qoınaýyn paıdalanýǵa tyıym salatyn zań jobasy tústi.
Aıta ketsek, Kaspıı teńizi ıtbalyqtarynyń rezervaty qurylady.
Sondaı-aq Prezıdent keńesshisi tabıǵı apatpen kúreste keshendi tásildiń kerektigin aıtty.