Qazaqstannyń ár óńirinde 1 bólmeli páterdi jalǵa alý baǵasy qansha
ASTANA. KAZINFORM – Statıstıka kórsetip otyrǵandaı, elimizdegi 20 mln-nan astam adamnyń tek 9,5 mln-ynda óz úıi bar. Sondyqtanda páter jaldaý baǵasy Qazaqstan azamattarynyń teń jartysynan astamy úshin ózekti saýal. Osy rette, Kazinform tilshisi memlekettiń ár óńirinde páterdi qanshaǵa jalǵa alýǵa bolatyndyǵyn anyqtap kórdi.
Ulttyq statıstıka basqarmasynyń málimetine súıensek, qyrkúıek aıynda el boıynsha jalǵa beriletin turǵyn úıdiń ortasha baǵasy 1,5%-ǵa qymbattady. Baǵa ásirese Óskemen men Qaraǵandyda kúrt ósken. Bul eki aımaqta páter jaldaý baǵasy 5 paıyzǵa qymbattap otyr. Úshinshi orynǵa Kókshetaý qalasy (4,8%) oryn tepken. Sondaı-aq Taldyqorǵan qalasynda da páter jaldaıtyndardyń qaltasyna túser salmaq birshama aýyrlaǵan (4,2%).
Halyq arasynda páterdi jalǵa alý baǵasy Almaty men Astanada ǵana qymbattap jatyr degen pikir bar. Statıstıka kórsetkendeı, Qazaqstannyń bas qalalarynda úıdi bir aıǵa jalǵa berý quny sáıkesinshe 1,6% jáne 1,4%-ǵa qymbattady. Al eldegi úshinshi iri megapolıs - Shymkentte baǵa 2,5 paıyzǵa ósken.
Ulttyq statıstıka bıýrosynyń dereginshe, Qazaqstanda jalǵa beriletin páterdiń bir sharshy metriniń baǵasy qyrkúıek aıynda 4471 teńgeni qurady. Eń joǵary baǵa Almatyda - 5 364 teńge.
Eń tómengi baǵa Taraz qalasynda - 2 074 teńge.
El aımaqtarynda bir bólmeli páterdi 1 aıǵa jalǵa alýdyń baǵasy kelesideı:
Qyrkúıek aıynyń sońynda bir top májilismen QR Ónerkásip jáne qurylys mınıstrligine páterdi jalǵa berý naryǵyn retteýdi, shekti baǵany engizýdi jáne barlyq jalǵa beriletin páterlerdi jaılylyq deńgeıi boıynsha jikteýdi usynǵan bolatyn.
Bul usynystyń negizgi maqsaty – turǵyn úı satyp alýǵa jaǵdaıy joq azamattar men stýdentterdi qorǵaý. Ázirge másele ashyq kúıinde qalyp otyr. Sebebi halyq qalaýlylary memlekettiń halyqtyń bir sanatynyń (páter ıeleri) quqyǵyn ekinshi sanattaǵylar (jalǵa alýshylar) úshin naryqtyq ekonomıka zańdaryn buzbaı qalaı shekteýi qajettigin naqty aıtqan joq.
