Qazaqstannyń altyn qory qosymsha 98 tonnaǵa artty

ASTANA. KAZINFORM — Qazaqstannyń altyn qory qosymsha 98 tonnaǵa artty. Bul týraly Úkimet otyrysynda Ónerkásip jáne qurylys vıtse-mınıstri Iran Sharhan aıtty. 

— Memleket basshysy Joldaýynda geologııa salasyn tsıfrlyq júıege kóshirý arqyly jańa deńgeıge jetkizý qajettigin erekshe atap ótti. Osy mindetterdi júıeli iske asyrý arqasynda búginde sala jańǵyrtýdan ótip jatyr. Qazir el boıynsha 103 túrli paıdaly qazba jáne 10 myńǵa jýyq ken orny memlekettik esepke alynǵan. 2 900-den astam lıtsenzııa jáne 250-ge qatty paıdaly qazbalar boıynsha kelisimshart bar, — dedi ol.

Onyń atap ótýinshe, geologııalyq barlaý jumystarynyń nátıjesinde alǵash ret Kók-Jon, Altyn-Shoko, Samombet, Stýdenttik jáne Taqyr-Qaljyr ken oryndary memlekettik esepke alyndy.

— Qor kólemi 98 tonna altynǵa, 36 myń tonna mysqa, 11 mıllıon tonna marganetske jáne 1,3 mıllıon tonna fosforıtke artty, — dedi Iran Sharhan.

Aıta keteıik, Úkimet otyrysynda geologııa jáne jer qoınaýyn paıdalaný salasyn damytý, tsıfrlandyrý sharalary, sonymen qatar halyqty dári-dármekpen qamtamasyz etý máselesi pysyqtalyp jatyr.