Qazaqstannyń altyn qory 7,4 tonnaǵa ulǵaıǵan

ASTANA. KAZINFORM – Altynnyń bir gramy shamamen 58 011 teńgeni qurap otyr, dep habarlaıdy Kazinform tilshisi.

Qazaqstan Ulttyq bankiniń málimetinshe, 7 tamyzda altyn gramynyń baǵasy 58 011,44 teńge boldy.

Qazaqstan Ulttyq bankiniń málimetinshe, 31 shilde kúni bir gramm altyn 58 524,25 teńgege turaqtady.

Taıaýda World Gold Council uıymy, ıaǵnı Dúnıejúzilik altyn keńesi keıingi aıda Qazaqstannyń altyn qory 7,4 tonnaǵa artqanyn málimdedi. Osylaısha el rezervindegi altynnyń jalpy kólemi 298 tonnadan asqan.

Halyqaralyq valıýta qory men Eýropalyq ortalyq bankti eseptemegende Qazaqstan altyn qory boıynsha 18-shi orynda tur.

Eske sala ketsek, Ónerkásip jáne qurylys mınıstrligi elimizdiń paıdaly qazbalarmen qamtamasyz etilý merzimine qatysty jańartylǵan derekterdi jarııalady.

Sońǵy málimetterge sáıkes, óndiristiń bar kólemin eskergende, Qazaqstandaǵy altyn qory 30 jylǵa jetedi.

Elordada altyn quıma qalaı quıylatyny týraly osy materıaldan oqı alasyz.

Buǵan deıin Qazaqstanda boljamdy resýrstary bar 38 perspektıvaly ýchaske anyqtalǵanyn habarlaǵan bolatynbyz.

Dúnıejúzilik altyn keńesiniń málimetinshe, 2025 jyldyń birinshi toqsanynda altynǵa jalpy suranys jyldyq mánde 1 paıyzǵa artyp, 1206 tonnany qurady, bul 2016 jyldyń birinshi toqsanynan bergi eń joǵary kórsetkish.

Ortalyq bankter birinshi toqsanda 244 tonna altyn satyp aldy – bul aldyńǵy toqsanmen salystyrǵanda az.

Altyn zergerlik buıymdarǵa suranys ta rekordtyq baǵalar jaǵdaıynda kúrt tómendedi, olardyń kólemi 2020 jyldan bergi eń tómengi deńgeıge jetti. Qundylyq turǵysynan alǵanda, altyn zergerlik buıymdarǵa tutynýshylyq shyǵyndar bir jylmen salystyrǵanda 9%-ǵa ósip, 35 mlrd dollarǵa jetti.

Ulttyq statıstıka bıýrosynyń derekterine súıensek, Qazaqstanda 2024 jyly altyn buıymdar baǵasy 8,3% ósti.