Qazaqstannyń alty óńirinde sý qoımalary men kanaldardy jańǵyrtý bastaldy
ASTANA. KAZINFORM - Sý resýrstary jáne ırrıgatsııa birinshi vıtse-mınıstri Nurlan Aldamjarov pen Bas prokýratýranyń Qoǵamdyq múddelerdi qorǵaý qyzmeti basshysynyń orynbasary Rızat Smaǵulov Islam damý banki qarjylandyratyn «Klımatqa tózimdi sý resýrstaryn damytý» jobasynyń birinshi kezeńin iske asyrý máseleleri boıynsha vedomstvoaralyq keńes ótkizdi.
QR Sý resýrstary jáne ırrıgatsııa mınıstrligi baspasóz qyzmetiniń habarlaýynsha, keńeske «Qazsýshar» RMK, bas merdiger uıymdar, avtorlyq qadaǵalaý ókilderi, sondaı-aq jobaǵa qatysýshy ózge de múddeli taraptar qatysty.
Kezdesý barysynda jobany iske asyrýdyń qazirgi kezeńderi, qurylys jáne daıyndyq jumystarynyń barysy, sondaı-aq is-sharalardy oryndaý merzimi men sapasyn saqtaý máseleleri qaraldy.
Sybaılas jemqorlyqtyń aldyn alý máselelerine erekshe nazar aýdaryldy.
Bas prokýratýra ókilderi sybaılas jemqorlyq quqyqbuzýshylyqtarynyń aldyn alý boıynsha túsindirý jumystaryn júrgizip, qatysýshylardy yqtımal jemqorlyq táýekelderimen jáne zańnamany buzǵany úshin qarastyrylǵan jaýapkershilik sharalarymen tanystyrdy.
Sonymen qatar qatysýshylarǵa quqyqbuzýshylyq faktileri týraly senim telefony arqyly anonımdi túrde habarlaýǵa bolatyny eskertildi.
Keńes qorytyndysy boıynsha Bas prokýratýra ókilderi jobalardyń iske asyrylýyn baqylaý jáne barlyq protsestiń ashyqtyǵyn qamtamasyz etý maqsatynda mundaı vedomstvoaralyq kezdesýler turaqty túrde ótkiziletinin málimdedi.
-Búginde «Klımatqa tózimdi sý resýrstaryn damytý» jobasynyń birinshi kezeńi aıasyndaǵy jumystar Qazaqstannyń alty óńirinde bastaldy. Joba sý qoımalaryn salý jáne qaıta jańǵyrtý, sondaı-aq ırrıgatsııa kanaldaryn jańǵyrtý sharalaryn qamtıdy. Bul bastama sý sharýashylyǵy ınfraqurylymyn damytý men jańǵyrtýǵa, sý resýrstaryn basqarý tıimdiligin arttyrýǵa jáne salanyń klımattyq turaqtylyǵyn qamtamasyz etýge baǵyttalǵan, - dedi Sý resýrstary jáne ırrıgatsııa birinshi vıtse-mınıstri Nurlan Aldamjarov.
Osyǵan deıin kásiporyndardyń sý tutynýy qatań baqylaýda bolatyny týraly jazdyq.
