Qazaqstannyń alty qalasynda jańa kómir energııa kózderi salynady
ASTANA. KAZINFORM — Aldaǵy jyldary Ekibastuz, Kýrchatov, Jezqazǵan, Kókshetaý, Semeı jáne Óskemen qalalarynda jańa kómir energııa kózderin salý josparlanyp otyr. Bul týraly Energetıka mınıstri Erlan Aqkenjenov Qazaqstan kómir ónerkásibiniń VII forýmynda málim etti.
— Ekibastuz, Kýrchatov, Jezqazǵan, Kókshetaý, Semeı jáne Óskemen qalalarynda jańa kómir energııa kózderin salý josparlanyp otyr. Bul jobalar elektr energııasyna artyp kele jatqan suranysty óteý jáne Birtutas elektr energetıkalyq júıeniń senimdiligin arttyrý úshin qajet, — dedi mınıstr.
Onyń aıtýynsha, elektr energııasyn tutyný kóleminiń artýy, ónerkásip pen tsıfrlyq ekonomıkanyń damýy, sondaı-aq energııany kóp qajet etetin jańa jobalardyń iske asyrylýy senimdi bazalyq qýat kózderine degen qajettilikti arttyryp otyr.
Osyǵan baılanysty Memleket basshysynyń tapsyrmasymen Úkimet 2026–2030 jyldarǵa arnalǵan «Kómir generatsııasyn damytý» ulttyq jobasyn bekitti.
Mınıstrdiń sózinshe, qujat jańa energetıkalyq nysandar salýdy, qoldanystaǵy qýat kózderin jańǵyrtýdy, keńeıtýdi jáne jańartýdy kózdeıdi. Sonymen qatar ulttyq joba aıasynda kómirmen jumys isteıtin elektr stantsııalaryn turaqty otynmen qamtamasyz etý tetikterin qalyptastyrýǵa erekshe kóńil bólinedi.
Erlan Aqkenjenov kómir ónerkásibi elimiz ekonomıkasynyń negizgi salalarynyń biri ekenin atap ótti. Onyń aıtýynsha, sala memlekettiń energetıkalyq qaýipsizdigin qamtamasyz etip, ónerkásip kásiporyndarynyń turaqty jumys isteýine jáne myńdaǵan azamattyń jumyspen qamtylýyna múmkindik berip otyr.
Sondaı-aq qazirgi jaǵdaıda kómir salasynyń aldynda óndiris tıimdiligin arttyrý, ınnovatsııalyq tehnologııalardy engizý, óndiristik protsesterdi tsıfrlandyrý, ekologııalyq kórsetkishterdi jaqsartý jáne ónerkásiptik qaýipsizdiktiń joǵary deńgeıin qamtamasyz etý mindeti turǵanyn aıtty.
Aıta keteıik, buǵan deıin Qazaqstanda kómirden gaz, dızel otyny jáne koks óndirýge baǵyttalǵan birneshe iri jobanyń iske asyrylyp jatqany belgili bolǵan edi.
