Qazaqstannyń alǵashqy áıel-farmakology Raısa Kúzdenbaeva ómirden ótti

ALMATY. KAZINFORM – Qazaqstannyń kórnekti ǵalymy, QR UǴA akademıgi, medıtsına ǵylymdarynyń doktory, professor, elimizdiń alǵashqy áıel-farmakology Raısa Kúzdenbaeva 83 jasynda dúnıeden ozdy. 

S. J. Asfendııarov atyndaǵy qazaq ulttyq medıtsına ýnıversıtetiniń ujymy marqumnyń dúnıeden ótýine baılanysty qaıǵysyna ortaqtasyp, týǵan-týystaryna, áriptesterine jáne shákirtterine kóńil aıtty.

– Raısa Kúzdenbaevanyń ómirden ozýy – otandyq medıtsına ǵylymy, farmakologııa salasy, joǵary medıtsınalyq bilim berý júıesi men jalpy densaýlyq saqtaý salasy úshin orny tolmas aýyr qaza. Ǵalymnyń qajyrly eńbegi, bıik ǵylymı bedeli men ustazdyq ulaǵaty kóptegen dáriger men farmakologtarǵa úlgi boldy. Onyń ǵylymı murasy men shákirtteri Qazaqstannyń medıtsınalyq tarıhynda máńgi saqtalady, - delingen habarlamada.

Raısa Kúzdenbaeva qazaq medıtsına ǵylymynyń kórnekti ókilderiniń biri boldy. Ol klınıkalyq jáne eksperımenttik farmakologııanyń damýyna, bilikti mamandardy daıarlaýǵa, ǵylymı mektep qalyptastyrýǵa jáne eldiń zııatkerlik áleýetin nyǵaıtýǵa ólsheýsiz úles qosty.

Sonymen qatar otandyq farmatsııany damytýǵa aıryqsha eńbek sińirip, jańa dárilik preparattardy tájirıbege engizdi, Qazaqstannyń tabıǵı shıkizaty negizinde biregeı dárilik zattardy ázirledi jáne farmakologııalyq saraptama júıesin jetildirdi.

Eske salaıyq, buǵan deıin Sýrdlımpıada oıyndarynyń chempıony Farhad Qystaýbaev ómirden ótkenin jazǵanbyz.