Qazaqstan álemniń qaı elderimen tyǵyz qarym-qatynasta
Qazaqstan álem boıynsha negizgi seriktestermen tyǵyz jáne ózara tıimdi yntymaqtastyqty damytý baǵytyn jalǵastyrýda. Bul týraly QR Syrtqy ister mınıstrliginiń resmı ókili Aıbek Smadııarov jyldyń qorytyndy brıfınginde baıandady, dep habarlaıdy Kazinform.
«Pragmatıkalyq turǵydan syrtqy saıasattyń túrki vektory iske asyrylýda. Qazaqstan, Túrkııa jáne Ázerbaıjan basshylarynyń mazmundy baılanystary qarym-qatynastardy keńeıtilgen strategııalyq áriptestik deńgeıine shyǵarýǵa jáne Túrki memleketteri uıymyn nyǵaıtýǵa múmkindik berdi. Astanada «TURKTIME!» uranymen ótken 10-shy sammıttegi bizdiń tóraǵalyǵymyz túrki áleminde ǵana emes, búkil álemde keń rezonans týdyrdy», - dedi Aıbek Smadııarov.
Onyń aıtýynsha, Prezıdent Qasym-Jomart Toqaevtyń Eýropanyń jetekshi elderiniń basshylarymen jáne EO-nyń joǵary laýazymdy tulǵalarymen baılanystary eýropalyq seriktestermen qarym-qatynasqa jańa serpin berip, sapaly jańa deńgeıge shyǵarýǵa múmkindik berdi.
«GFR, Frantsııa prezıdentteriniń, Majarstan jáne Chehııa premer-mınıstrleriniń, Albanııa prezıdentiniń, Ulybrıtanııa, Italııa, Lıýksembýrg jáne Shveıtsarııa syrtqy ister mınıstrleriniń QR-ǵa saparlary erekshe boldy. Jalpy, Eýropa úshin Qazaqstan barǵan saıyn mańyzdy saýda-ekonomıkalyq áripteske jáne energetıkalyq qaýipsizdikti qamtamasyz etýdegi kepilgerlerdiń birine aınalýda. Memleketimizdiń tarıhynda tuńǵysh ret QR Syrtqy ister mınıstriniń Rýmynııaǵa, Serbııaǵa jáne Soltústik Makedonııaǵa resmı saparlary ótti. Ol sondaı-aq Belgııaǵa, Majarstanǵa, Lıýksembýrgke baryp, halyqaralyq alańdarda Estonııa, Polsha, Chehııa jáne Albanııadaǵy áriptesterimen kezdesti», - dedi QR SІM ókili.
Sondaı-aq Qazaqstan Reseımen pragmatıkalyq kópjaqty yntymaqtastyqty damytýdy jalǵastyrýda. Qasym-Jomart Toqaevtyń Reseıge sapary jáne RF Prezıdenti Vladımır Pýtınniń Astanaǵa saparynda kelissózder nátıjeli boldy, bul rette Qostanaıda ótken Óńiraralyq forým saýda-ekonomıkalyq yntymaqtastyqqa mańyzdy serpin berdi.
Qazaqstan Syrtqy ister mınıstri Murat Nurtileýdiń Reseıge resmı saparynda Syrtqy saıası vedomstvolar arasyndaǵy yntymaqtastyq jónindegi is-sharalar josparyna qol qoıyldy. Qazaqstan-Reseı birlesken demarkatsııalyq komıssııasynyń 10-shy otyrysy ótti.
Al M. Nurtileýdiń Belarýske resmı saparynda qazaq-belarýs qatynastarynyń strategııalyq deńgeıi rastaldy. Ońtústik Kavkaz elderimen ózara is-qımyl teńgerimi maqsatynda Ázerbaıjan jáne Armenııa syrtqy ister mınıstrlerimen kezdesýler ótkizildi.
«Qytaımen de «máńgilik jan-jaqty strategııalyq áriptestik» dáıekti túrde nyǵaıtylýda. QR Prezıdentiniń QHR-ǵa memlekettik sapary, «Bir beldeý, bir jol» úshinshi forýmyna qatysý, QHR basshylyǵymen turaqty baılanystar Beıjińmen yntymaqtastyqtyń jańa kókjıegin ashty. Dıplomattardyń qoldaýymen alǵash ret Qazaqstan men QHR óńirleri, ásirese Shyńjań uıǵyr avtonomııalyq aýdanymen qarqyndy yntymaqtastyq belgilendi. Eki memleket azamattary úshin vızasyz rejım týraly ýaǵdalastyqtarǵa qol jetkizildi, Sıan qalasynda QR Bas konsýldyǵy ashyldy. Pandemııaǵa baılanysty 3 jyldyq úzilisten keıin shekara syzyǵyn birlesip tekserý boıynsha kelissózder qaıta bastaldy», - dep túsindirdi resmı ókil.
Memleket basshysy Qasym-Jomart Toqaevtyń AQSh Prezıdenti Djo Baıdenmen senimdi kelissózderi jáne QR Syrtqy ister mınıstri Murat Nurtileýdiń AQSh Memlekettik hatshysy Entonı Blınkenmen dıalogy strategııalyq áriptestiktiń jańa mazmundy tustaryn belgileýge múmkindik berdi.
«Qazaqstan Prezıdentiniń BAÁ, Saýd Arabııasy, Vetnam basshylarymen saparlary men kelissózderi, Sıngapýr Prezıdenti, Katar Ámiri jáne Togo Prezıdentiniń Astanaǵa saparlary Jahandyq Ońtústik elderinde Qazaqstannyń múddelerin ilgeriletýge yqpal etti. Qazaqstannyń «Jahandyq Ońtústik daýysy» vırtýaldy sammıtine qatysýy jáne Prezıdent aıtqan messedjder kóshbasshylardyń oń pikirin týdyrdy», - deıdi spıker.
QR Syrtqy ister mınıstriniń Úndistanǵa saparynda Qazaqstannyń saýda, ınvestıtsııalar, kólik jáne tranzıt salasyndaǵy uzaq merzimdi ózara tıimdi yntymaqtastyqty nyǵaıtýǵa múddeliligi kórindi
Ońtústik Koreıanyń Syrtqy ister mınıstrimen kelissózder barysynda ózara is-qımyldyń perspektıvalyq baǵyttary talqylanyp, syrtqy saıası vedomstvolar arasyndaǵy yntymaqtastyq týraly memorandýmǵa qol qoıyldy.
«Qazaqstan budan bylaı da BUU Jarǵysyn, halyqaralyq quqyqty jáne halyqaralyq qatynastardaǵy teńdik pen demokratııa qaǵıdattaryn udaıy saqtaýdy jaqtaıdy. Memleket basshysy aıtqandaı, halyqaralyq týrbýlenttilik jaǵdaıynda Qazaqstan teńgerimdi, kópvektorly jáne syndarly syrtqy saıasatty ustanady», - dedi Aıbek Smadııarov.