Qazaqstan halqynyń ómir súrý sapasy EYDU elderinen ozdy
ASTANA. KAZINFORM — QR SJRA Ulttyq statıstıka bıýrosy Ekonomıkalyq yntymaqtastyq jáne damý uıymynyń (EYDU) «Better Life Index» ádistemesine sáıkes, 2024 jylǵa arnalǵan Qazaqstandaǵy ómir súrý sapasynyń ındeksi kórsetkishterin jarııalady.
Atalǵan ındeks EYDU tańdaýy boıynsha eldiń damý deńgeıin sıpattaıtyn ál-aýqat kórsetkishterin qamtıdy. Munda halyqtyń materıaldyq nemese ekonomıkalyq ál-aýqaty ǵana emes, sonymen qatar adam áleýetin ósirýge baılanysty mańyzdy aspektiler de eskeriledi. Qazaqstan birqatar kórsetkish boıynsha oń nátıjege qol jetkizdi.
Bıýro derekterine sáıkes, 2024 jyly halyqtyń moraldy qoldaýǵa qanaǵattaný deńgeıi, ıaǵnı qıyn sátte ıek artar jandardyń bar ekenine degen senim 93,3% qurady. EYDU elderi boıynsha bul kórsetkishtiń ortasha deńgeıi — 91%.
Ómirge qanaǵattaný kórsetkishi boıynsha qazaqstandyqtar óz ómirin 10 balldyń ishinen 7,6 ballǵa baǵalaǵan. Respondentter kúndelikti ómirde jaǵymdy emotsııalardy jaǵymsyzdarǵa qaraǵanda jıirek sezinetinin atap ótken. EYDU elderi boıynsha bul kórsetkish orta eseppen — 7,3 ball.
2024 jyly uzaq merzimdi jumyssyzdyq deńgeıi, ıaǵnı bir jyldan astam ýaqyt jumyssyz júrgenderdiń úlesi 0,2 paıyzdyq tarmaqqa tómendep, 1% kórsetti. Eńbekke qabiletti jastaǵy halyqtyń 80% astamy jumyspen qamtylǵan. Bul EYDU elderindegi ortasha deńgeıden (78%) joǵary. Sonymen qatar aptasyna 50 saǵattan artyq jumys isteıtinderdiń úlesi aldyńǵy jylmen salystyrǵanda 0,4 paıyzdyq tarmaqqa azaıyp, 2% qurady. EYDU elderinde bul kórsetkish 7,1%.
«Qaýipsizdik» kórsetkishi boıynsha 2024 jylǵy quqyq qorǵaý organdaryna degen senim aıasyndaǵy halyq arasynda júrgizilgen saýalnama qorytyndylaryna sáıkes, suralǵandardyń 93,9% túnde kóshege shyqqanda ózin qaýipsiz sezinedi eken. Bul EYDU elderi boıynsha ortasha kórsetkishten (74%) edáýir joǵary.
EYDU — demokratııa qaǵıdattaryn ustanatyn damyǵan naryqtyq ekonomıkasy bar elderdi biriktiretin halyqaralyq uıym. Uıymnyń negizgi maqsaty — turaqty ekonomıkalyq ósimdi qamtamasyz etýge jáne múshe elderdiń ómir súrý deńgeıin arttyrýǵa baǵyttalǵan úılestirilgen saıasatty júrgizý. EYDU-ǵa 38 memleket múshe, onyń ishinde Avstrııa, Belgııa, Germanııa, Kanada, Japonııa, Ulybrıtanııa, AQSh, Frantsııa, Norvegııa, Shvetsııa jáne t. b. elder bar.
Buǵan deıin habarlaǵandaı, Qazaqstan Azııadaǵy eń baqytty elder úshtigine kirdi.