Qazaqstannyń akkredıtteý júıesi álemdegi úzdik 32 eldiń qataryna kirdi
ASTANA. KAZINFORM – Qazaqstan akkredıtteýdi damytý deńgeıi boıynsha 185 memlekettiń ishinde 32-oryndy ıelendi, dep habarlaıdy Global Quality Infrastructure Index (GQII) 2025 derekteri.
Jahandyq sapa ınfraqurylymy ındeksiniń jalpy reıtınginde Qazaqstan 48-orynǵa jaıǵasqan. Eldiń kórsetkishteri ulttyq sapa ınfraqurylymynyń úsh negizgi quramdas bóligi – akkredıtteý, metrologııa jáne standarttaý boıynsha baǵalandy.
Qazaqstan eń joǵary nátıjeni akkredıtteý salasynda kórsetip, 32-orynǵa turaqtady. Metrologııa boıynsha elimiz 43-orynda, al standarttaý salasynda 70-orynda tur.
Akkredıtteý – sapa ınfraqurylymynyń negizgi elementteriniń biri. Ol synaq jáne kalıbrleý zerthanalarynyń, sertıfıkattaý jáne ınspektsııalyq organdardyń quzyrettiligin resmı túrde tanýdy qamtamasyz etedi.
– Tıimdi jumys isteıtin akkredıtteý júıesi synaq, ólsheý jáne sertıfıkattaý nátıjelerine degen senimdi arttyrýǵa yqpal etedi, sondaı-aq olardyń nátıjelerin halyqaralyq deńgeıde taný úshin jaǵdaı jasaıdy, – delingen Saýda jáne ıntegratsııa mınıstrliginiń málimetinde.
GQII ındeksi álemniń ártúrli elderindegi sapa júıeleriniń damý deńgeıin salystyrýǵa múmkindik beredi. Reıtıngti qalyptastyrý kezinde akkredıtteý, standarttaý jáne metrologııa salalaryndaǵy kórsetkishter taldanady.
Indeks sapa ınfraqurylymynyń resmı ınstıtýttarynyń ashyq derekteri negizinde jasalady. Onyń ishinde metrologııa, standarttaý jáne akkredıtteý salasyndaǵy halyqaralyq uıymdar men ulttyq organdardyń málimetteri paıdalanylady.
GQII nátıjeleri ulttyq sapa ınfraqurylymynyń jaı-kúıin baǵalap, onyń damý deńgeıin halyqaralyq kórsetkishtermen salystyrýǵa múmkindik beredi. Damyǵan sapa ınfraqurylymy ónimder men qyzmetterge degen senimdi qamtamasyz etýge, halyqaralyq saýdany damytýǵa jáne ekonomıkanyń básekege qabilettiligin arttyrýǵa yqpal etedi.
Jahandyq sapa ınfraqurylymy ındeksi – Mesopartner bastamasy. Joba Germanııanyń Ulttyq metrologııalyq ınstıtýty (PTB) men Germanııanyń Ekonomıkalyq yntymaqtastyq jáne damý federaldy mınıstrliginiń (BMZ) kópjyldyq qarjylyq jáne mazmundyq qoldaýymen, ulttyq sapa ınfraqurylymy organdary men halyqaralyq sarapshylardyń qatysýymen júzege asyrylady.
2023 jyldan bastap joba BUUÓDU (ıÝNIDO) jáne INetQI seriktesterimen tyǵyz yntymaqtastyqta jumys isteıdi.
Aıta keteıik, 2027 jyldan bastap josparly akkredıtteý baǵalaýlary onlaın formatta ótedi.
