Qazaqstannyń agrosektordy damytý áleýeti zor — BUU ókili
ASTANA. KAZINFORM — BUU-nyń azyq-túlik jáne aýyl sharýashylyǵy uıymynyń bas dırektorynyń orynbasary, Eýropa jáne Ortalyq Azııa boıynsha óńirlik ókili Vıorel Gýtsý Qazaqstannyń aýyl sharýashylyǵy ónimderin óndirý dınamıkasyna oń baǵa berdi.
BUU ókili usynǵan málimetke súıensek, atalǵan uıym byltyr Qazaqstanda eki jobany maquldaǵan. Onyń biri ósimdikter selektsııasy men tuqym sharýashylyǵy boıynsha (quny 2,6 mln AQSh dollary), ekinshisi Soltústik Qazaqstandaǵy jerdiń tozýymen kúres jobasy (quny 2,5 mln AQSh dollary).
— Qazaqstan — aýyl sharýashylyǵy ónimderin netto-ımporttaýshy el, onyń ishinde ımporttyń 60 paıyzdan astamy tutynýǵa arnalǵan qaıta óńdelgen taýarlar. Sondaı-aq Qazaqstan shıkizat taýarlaryn eksporttaıdy jáne óndiris kólemin 75 paıyzǵa deıin ulǵaıtý áleýetine ıe. Eldiń aýyl sharýashylyǵy ónimderi boıynsha eksporttyq-ımporttyq saıasaty agro-taýarlar saýdasyn jandandyrýdyń negizi, — dedi Vıorel Gýtsý dóńgelek ústel barysynda.
Osy oraıda BUU ókili aýyl sharýashylyǵy ónimderiniń saýdasyn nyǵaıtý úshin qaýipsizdik júıesiniń beriktigi qajettigin aıtyp otyr.
— Qaýipsizdik óndiris standarttaryn, sonyń ishinde kodeks standarttaryn engizý men baqylaýdy, sondaı-aq senimdi veterınarııa jáne janýarlar saýlyǵy júıelerin, fıtosanıtarııa men tuqym sharýashylyǵyn, orman sharýashylyǵynyń turaqty sektorlaryn, balyq sharýashylyǵy men akva-ónim salasyn qamtamasyz etedi. Odan bólek, Qazaqstan — bıdaı, sút ónimderi, zyǵyr tuqymy, et, qyzanaq, kartop, qııar, alma sııaqty ónimderdiń iri óndirýshisi. Atalǵan ónimderdiń ishinde, ásirese, dándi daqyldar sektorynyń básekege qabilettiligin arttyrýǵa múmkindik bar. Sonyń ishinde bizdiń uıymnyń aýyl sharýashylyǵy naryǵy týraly aqparattyq júıesine (AMIS) qosylýǵa bolady. Al «Bir el — bir basym ónim» bastamasy qazaqstandyq alma saýdasynyń ósýine yqpal ete alady. Bul turǵyda Qazaqstannyń agrosektordy damytý áleýeti zor, — deıdi sheteldik meıman.
Búgin elordada Birikken Ulttar Uıymynyń azyq-túlik jáne aýyl sharýashylyǵy uıymy (FAO) men elimizdiń Aýyl sharýashylyǵy mınıstrliginiń uıytqy bolýymen azyq-túlik júıelerin qaıta qurý boıynsha áleýmettik jobalardy talqylaýǵa arnalǵan dóńgelek ústel ótti.
Aıta keteıik, byltyr aýyl sharýashylyǵy ónimderi kólemi 13,7%-ǵa artyp, sala úshin rekordtyq maýsym boldy.
Sondaı-aq elimizde aýyl sharýashylyǵy ónimderin qaıta óńdeýdi damytýdyń keshendi jospary qabyldanǵanyn habarlaǵan bolatynbyz.
Eske salsaq, elimiz shegirtkemen jasandy ıntellektiniń kómegimen kúrespek.