Qazaqstannyń agroónimderi qaı elge eksporttalady

  ASTANA. KAZINFORM – 2025 jyldyń 7 aıynda agroónerkásip óniminiń eksporty turaqty ósimdi kórsetti.  Bul týraly Saýda jáne ıntegratsııa mınıstri Arman Shaqqalıev aıtyp berdi.

Mınıstrdiń aıtýynsha, ósimdik sharýashylyǵynda aqshalaı eseptegende ósim 51% boldy. Onyń ishinde bıdaı (56%), kúnbaǵys maıy (76%), mal azyǵy (152%), arpa (94%) jáne zyǵyr tuqymy (60%).

– Qazaqstandyq agroóónimderge syrtqy suranys TMD, Qytaı, Eýropa, Taıaý Shyǵys jáne Ońtústik-Shyǵys Azııa elderinen baıqalady. Osy baǵyttar boıynsha syrtqy saýda-logıstıkalyq ınfraqurylym qalyptastyrylyp jatyr. Oǵan negizgi seriktes elderdegi ulttyq saýda pavılondary, keńseler men ókildikter kiredi, – dedi Saýda mınıstri Úkimettiń búgingi otyrysynda.

Eksporttyq baǵyttardy odan ári keńeıtý úshin bıyl EýraOdaq pen Arab Ámirlikteri jáne Mońǵolııa arasynda erkin saýda júrgizý týraly kelisimderge qol qoıyldy. Sondaı-aq EýraOdaq pen Indonezııa arasynda da osyndaı kelisim josparlanyp otyr.

Buǵan deıin Arman Shaqqalıev áleýmettik mańyzy bar azyq-túlik baǵalaryn turaqtandyrý jáne sıyr etimen ishki naryqty toltyrý sharalary týraly aıtyp berdi.

Sońǵy birneshe jyl boıy tarıfterdiń jyl saıynǵy ósýine qaramastan sıyr etiniń baǵasy saqtalyp keldi. Nátıjesinde kórshi elderdegi joǵary suranysqa baılanysty onyń baǵasy eń qoljetimdi ári eksportqa tartymdy bolyp otyr.