Qazaqstannyń agroónerkásip keshenine 807 mlrd teńge ınvestıtsııa tartyldy — AShM
ASTANA. KAZINFORM — Aýyl sharýashylyǵy mınıstri Aıdarbek Saparovtyń aıtýynsha, óńirlerde bul baǵytta áli de belsendi jumys atqarý kerek. Ol týraly mınıstr oblys ákimderiniń orynbasarlary, óńirler men Astana, Almaty jáne Shymkent qalalarynyń aýyl sharýashylyǵy basqarmalarynyń basshylary, aýmaqtyq ınspektsııalar jáne vedomstvolyq uıymdar, jıyny 200-den astam ókil qatysqan ınvestıtsııa tartýdyń qorytyndylary men josparlary týrasyndaǵy alqa otyrysynda aıtyldy. Bul týraly AShM jazdy.
Vıtse-mınıstr Ermek Kenjehanulynyń aıtýynsha, osy jyldyń 8 aıynda 807 mlrd teńge ınvestıtsııa ıgerildi. Onyń ishinde aýyl jáne balyq sharýashylyǵyna — 591 mlrd teńge, azyq-túlik ónimderi óndirisine — 134 mlrd teńge, sýsyndar óndirisine — 82,1 mlrd teńge baǵyttalǵan. Birqatar óńirler jospardy artyǵymen oryndady: Atap aıtqanda, Shymkent qalasy — 146%, Soltústik Qazaqstan oblysy — 133%, Aqmola oblysy — 111%, Almaty qalasy — 106%, Almaty oblysy — 105%, Pavlodar oblysy — 102% qamtydy. Al, Mańǵystaý, Atyraý, Qyzylorda, Jambyl, Shyǵys Qazaqstan, Batys Qazaqstan oblystarynda, sondaı-aq Ulytaý men Jetisý oblystarynda belsendiliktiń tómendigi baıqalady.
Bıylǵy jylǵa arnalǵan Jol kartasy naqtylanǵannan keıin ınvestıtsııalyq jobalardyń sany 274-ke deıin qysqartyldy, barlyǵy 559,7 mlrd teńgeni quraıdy. Onyń ishinde 96 joba júzege asyryldy. Prezıdenttiń tapsyrmasyna sáıkes, eldiń azyq-túlik qaýipsizdigin qamtamasyz etýge baǵyttalǵan 202 ınvestıtsııalyq joba jıyntyǵy ázirlendi. Onyń jalpy quny — 4,2 trln teńge. Soltústik Qazaqstan oblysynyń tájirıbesin taratý baǵdarlamasy aıasynda 17 óńir men Astana jáne Shymkent qalalarynda 141 jobany júzege asyrýǵa 200 mlrd teńge bólinbek. Búginde 45 joba boıynsha jumys bastaldy, onyń 24-i, ıaǵnı, 32,5 mlrd teńge ıgerildi. Alaıda Qostanaı, Almaty jáne Jetisý oblystarynda qarqyn tómen.
Osy rette Aıdarbek Saparov qazirgi ınvestıtsııalyq jospardyń oryndalý deńgeıi mardymsyz ekenin atap ótti:
— Agroónerkásiptik keshenge ınvestıtsııa tartý — tek qarjylandyrýmen baılanysty bolmaýǵa tıis. Sonymen birge, bul — aımaqtardyń aýyl sharýashylyǵyn órkendetýge degen jaýapkershilikterin de kórsetedi. Biz júıeli ári ashyq jumys júrgizip, jobalardy sapaly irikteýdi jáne ýaqytyly júzege asyrýdy qamtamasyz etýimiz qajet. Eldiń azyq-túlik qaýipsizdigi men eksporttyq áleýeti tikeleı osy jumystardyń tıimdiligi men nátıjesine baılanysty, — dedi mınıstr.
Otyrys qorytyndysynda kórsetkishteri tómen óńirlerge qysqa merzimde jańartylǵan josparlar men sharalardy usyný, ınvestıtsııa tartý jumysyn jandandyrý, sapaly joba jıyntyǵyn qalyptastyrý jáne olardyń oryndalýyna baqylaýdy kúsheıtý tapsyryldy.
— Jumys nátıjege baǵyttalýy kerek, mınıstrlik pen óńirler arasynda naqty úılesimdi is-qımyl jolǵa qoıylyp, jobalardy júzege asyrý kezinde ashyqtyq qamtamasyz etilýi kerek, — dedi mınıstr.
Aıta keteıik, elimizde 18,4 mln tonna astyq bastyryldy.