Qazaqstannyń agrarlyq sektoryna 100 mln dollar ınvestıtsııa tartyldy
ASTANA.KAZINFORM — «Azyq-túlik kelisimshart korporatsııasy» Ulttyq kompanııasy» aktsıonerlik qoǵamy men Eýrazııalyq damý banki (EADB) 100 mln AQSh dollary kóleminde kredıttik jeli ashý týraly kelisimge qol qoıdy. Bul týraly AShM málim etti.
Qarajat ulttyq astyq operatorynyń óz jobalaryn iske asyrýǵa, sondaı-aq fermerlerdi qarjylandyrýǵa, basym aýyl sharýashylyǵy daqyldaryn óndirýdi yntalandyrýǵa jáne ishki naryqty ósimdik sharýashylyǵy ónimderimen turaqty qamtamasyz etýge baǵyttalmaq.
«Azyq-túlik kelisimshart korporatsııasy» men EADB arasyndaǵy yntymaqtastyq Qazaqstannyń azyq-túlik qaýipsizdigin nyǵaıtýǵa jáne el ekonomıkasynyń ósimine serpin beretin negizgi salalardyń biri retinde agroónerkásiptik keshendi damytýǵa arnalǵan.
Kelisimge halyqaralyq ınvestıtsııalar men Eýrazııa óńiriniń damý perspektıvalaryna arnalǵan bıznes-forým aıasynda qol qoıyldy.
«Azyq-túlik kelisimshart korporatsııasy» UK» AQ Basqarma tóraǵasynyń birinshi orynbasary Ildar Ismagýlovtyń aıtýynsha, tartylatyn qaryz ulttyq operatordyń agrarlyq sektordy qoldaý jónindegi qarjylyq múmkindikterin keńeıtedi.
— Biz EADB-ǵa strategııalyq áriptestigi úshin alǵysymyzdy bildiremiz. Bul «Azyq-túlik kelisimshart korporatsııasyna» Qazaqstannyń ǵana emes, búkil óńirdiń azyq-túlik turaqtylyǵyn qamtamasyz etetin memlekettik ınstıtýt retinde kórsetilgen senimniń aıqyn kórinisi, — dedi ol qol qoıý rásiminde.
EADB Basqarma tóraǵasynyń orynbasary Rýslan Dálenov bul kelisim atalǵan korporatsııamen uzaqmerzimdi yntymaqtastyqtyń zańdy jalǵasy ekenin atap ótti.
— EADB úshin qatysýshy memleketter ekonomıkalarynyń ornyqty damýyna, onyń ishinde agroónerkásiptik keshendi qoldaý arqyly úles qosý mańyzdy, — dedi ol.
Aıta keteıik, 2025 jylǵy qazanda halyqaralyq Moody’s Ratings reıtıngtik agenttigi «Azyq-túlik korporatsııasynyń» kredıttik reıtıngi boıynsha boljamdy «turaqtydan» «ońǵa» deıin jaqsartty. Bul ulttyq operatordyń qarjylyq turaqtylyǵynyń nyǵaıǵanyn kórsetedi.
Aıta keteıik, fermerler úshin saqtandyrý polısiniń 80%-y sýbsıdııalanady.
