Qazaqstannyń agrarlyq áleýetin tolyq iske asyrýǵa atsalysýǵa múddelimiz – Nıderland Elshisi
ASTANA. KAZINFORM – Nıderland Koroldiginiń Qazaqstandaǵy Elshisi Nıko Shermers eki eldiń arasyndaǵy agroónerkásip baılanystary qalaı damyp jatqanyn aıtty.
- Ózim oqyǵan sońǵy zertteýdiń deregine súıensek, Qazaqstannyń álemdik azyq-túlik naryǵyna 25 paıyz úles qosatyndaı áleýeti bar. Nıderland osy áleýettiń iske asýyna atsalysqysy keledi. Nıderland tehnologııalary Qazaqstanda salaýatty azyq-túlik óndirisin damytýǵa qoldanylǵanyna múddelimiz. Qolymyzda bar bilimdi, tehnologııalardy bólisýge ázirmiz. Ol úshin eki jaqtyń sarapshylary tyǵyz baılanys ornatý kerek. Qazaqstan óz aımaǵyn ǵana sapaly azyq-túlikpen qamtyp qoımaı, álemdegi azyq-túlik qaýipsizdigine úles qosa alady, - dedi ol Astanadaǵy halyqaralyq gúl kórmesiniń ashylý saltanaty aldynda Kazinform tilshisine bergen shaǵyn suhbatynda.
Onyń aıtýynsha, Nıderland kompanııalary qazaqstandyq áriptesterimen sý jáne tok únemdeıtin tehnologııalardy bólisý máselesin talqylaýǵa daıyn.
- Osynda ótetin gúl kórmesine Nıderland elinen jyl saıyn jańa kompanııalar qosylyp jatqanyn kórip otyrmyz. Ásirese qazaqstandyq fermerlerge qurǵaq jáne jańbyrly klımattarǵa beıimdelgen gúlder men daqyl tuqymdary qyzyqty bolady dep oılaımyn. Nıderland delegatsııasynyń quramynda jetekshi tyńaıtqysh óndirýshiler de bar. Sý únemdeý, tok únemdeý tehnologııasyn usynatyn kompanııalar da Qazaqstanǵa ınvestıtsııa salý máselelerin pysyqtaýǵa daıyn.
Men ózimizdiń kompanııalarǵa da, Qazaqstan kompanııalaryna da únemi aıtyp júremin. Eki arada týyndaýy múmkin kez kelgen máseleni, kedergini sheshýge bolady. ıAǵnı, Nıderland eline barǵan qazaqstandyq kásipker nemese Qazaqstanǵa kelgen nıderlandyq kásipker tap bolǵan máselesimen jalǵyz qalmaıdy. Elshilikter kez kelgen máseleni jergilikti organdarmen birlese otyryp retteýge kómektesedi. Ol jaǵynan jumys jolǵa qoıylǵan, - deıdi elshi.
Aýyl sharýashylyǵy vıtse-mınıstri Azat Sultanovtyń aıtýynsha, Qazaqstan keleshekte mal sanyn Nıderland ádisimen retteýi múmkin.