Qazaqstan AEHA-nyń Qıyr Shyǵys óńirlik tobyna qosyldy - SІM

ASTANA. KAZINFORM – QR Syrtqy ister mınıstrligi Atom energııasy jónindegi halyqaralyq agenttiktiń (AEHA) Basqarýshylar keńesiniń búgingi otyrysynda Qazaqstandy Qıyr Shyǵys óńirlik tobyna qabyldaý jóninde jarııalanǵan sheshimdi quptady.

Mınıstrliktiń málimetinshe, bul qadam AEHA Jarǵysyna jáne elimizdiń bastamasymen 2023 jylǵy 29 qyrkúıekte qabyldanǵan GC(67)/RES/15 qararyna sáıkes agenttik sheńberinde múshe memleketterdiń egemendik teńdigin qalpyna keltirýdegi mańyzdy kezeń bolyp sanalady.

- Bul sheshim Qazaqstannyń jahandyq beıbitshilik pen qaýipsizdikti nyǵaıtýǵa, ıadrolyq qarýsyzdaný men taratpaý rejımin qoldaýǵa degen turaqty ustanymyn taǵy bir márte rastaıdy, - delingen qujatta.

Mınıstrlik múshe memleketterdiń AEHA-daǵy egemendik teńdikti qalpyna keltirý jolyndaǵy kúsh-jigerin joǵary baǵalap, Qıyr Shyǵys tobyna qatysýshy elderge kórsetken qoldaýy men senimi úshin rızashylyǵyn bildirgen.

- Qazaqstannyń jańa mártebesi elimizge AEHA basqarýshy organdarynyń jumysyna tolyqqandy qatysýǵa múmkindik beredi, - dep qosqan vedomstvo.

SІM atap ótkendeı, Qazaqstan jappaı qyryp-joıý qarýlarynan azat álem qalyptastyrýǵa baǵyttalǵan halyqaralyq kúsh-jigerdiń belsendi qatysýshysy retinde atom energııasyn beıbit maqsatta paıdalaný, ıadrolyq tehnologııalardy jaýapkershilikpen qoldaný jáne ashyqtyq tetikterin nyǵaıtý isine óz úlesin qosýdy jalǵastyrýǵa daıyn.

Aıta keteıik, AEHA Qazaqstanǵa atom elektr stantsııasyn salýdyń barlyq kezeńinde qoldaý kórsetpek.