Qazaqstannyń Ádilet mınıstrligi VS Rolex — sotta kim jeńedi?
ASTANA. KAZINFORM — Qazaqstannyń Ádilet mınıstrligi shveıtsarııalyq saǵat shyǵarýshy Rolex kompanııasymen sot protsesine qatysty túsinik berdi. Eske sala ketsek, bul kompanııa ókilderi Astananyń mamandandyrylǵan aýdanaralyq sotyna shaǵym túsirgen bolatyn.
Vedomstvonyń málimetinshe, 2023 jyldyń 19 maýsymynda Qazaqstan azamaty úshin COSMO saýda belgisi tirkelgen.
Sol jyldyń 4 qyrkúıeginde Rolex SA ókiliniń atynan osy taýar belgisiniń kúshin joıýǵa qarsylyq kelip tústi.
Shveıtsarııalyq kompanııanyń pikirinshe, otandyq tutynýshy bul taýar belgisin belgili shveıtsarııalyq kompanııamen, atap aıtqanda onyń Cosmograph saýda belgisimen baılanystyrady.
Ákimshilik protsedýralar sheńberinde Ádilet mınıstrliginiń apellıatsııa alqasy bul qarsylyqty qarap, ony ózgerissiz qaldyrdy.
2024 jyldyń 20 aqpanynda apellıatsııa keńesi Cosmo saýda belgisiniń kúshin joıýdan bas tartý týraly sheshim qabyldady.
«Qarsylyqty qaraǵan ogrgan apellıatsııalyq keńes músheleriniń pikirinshe, Rolex SA kompanııasynyń Cosmograph saýda belgisi men Cosmo saýda belgisin tutynýshy bir dep qabyldaýy múmkin emes», — dep tolyqtyrdy Ádilet mınıstrligi.
Qazirgi kezde Rolex SA ókili ákimshilik is júrgizý aıasynda apellıatsııa sheshimine shaǵym túsirdi.
20 mamyrda Astana qalasynyń mamandandyrylǵan aýdanaralyq sotynda aldyn ala tyńdaý ótti, sot otyrysy 5 maýsymǵa belgilendi.
«Mundaı daý-damaılar erekshelik emes ekenin jáne apellıatsııalyq keńestiń sheshimderine shaǵymdaný ádettegi tájirıbe ekenin eskerý kerek. Máselen, 2023 jyly 87 sheshimniń 21-i boıynsha sot tártibinde shaǵym jasalǵan», — dep tolyqtyrdy Ádilet mınıstrligi.
