Qazaqstannyń adam saýdasyna qarsy kúres tájirıbesi EQYU konferentsııasynda tanystyryldy
ASTANA. KAZINFORM — Qazaqstan delegatsııasy Syrtqy ister mınıstrliginiń erekshe tapsyrmalar jónindegi elshisi Stanıslav Vasılenkonyń jetekshiligimen Eýropadaǵy qaýipsizdik jáne yntymaqtastyq uıymynyń (EQYU) Adam saýdasyna qarsy kúres jónindegi alıansynyń 26-konferentsııasyna qatysty.
Іs-sharada qazaqstandyq delegatsııa basshysy negizgi sessııada sóz sóılep, EQYU Bas hatshysy Ferıdýn Sınırlıoǵlý, Demokratııalyq ınstıtýttar jáne adam quqyqtary bıýrosynyń dırektory Marııa Telalıan, EQYU-nyń adam saýdasyna qarsy kúres jónindegi arnaıy ókili Kerı Djonston, sondaı-aq Shveıtsarııanyń Ádilet jáne polıtsııa federaldyq departamenti basshysynyń keńesshisi Beat ıAns sekildi halyqaralyq sarapshylarmen qatar pikir bildirdi.
Stanıslav Vasılenko óz sózinde bul alańnyń mańyzyn atap ótip, Alıans adam saýdasyna qarsy kúreste ulttyq jáne halyqaralyq kúsh-jigerdi úılestirýge jáne adam quqyqtaryn qorǵaýǵa eleýli úles qosyp otyrǵanyn aıtty.
Onyń aıtýynsha, adam saýdasy – adam quqyqtaryn óreskel buzatyn, kóbine jasyryn sıpatta bolatyn aýyr qylmystardyń biri. Osyǵan baılanysty ol máseleni tıimdi sheshý úshin keshendi tásil qajet ekenin, ıaǵnı halyqaralyq yntymaqtastyqty kúsheıtý, aldyn alý sharalaryn damytý, qylmystardy anyqtaý men tergeýdi jetildirý, sondaı-aq jábirlenýshilerdi qorǵaý men qoldaýdy qamtamasyz etý mańyzdy ekenin jetkizdi.
Konferentsııa qatysýshylaryna Qazaqstanda adam saýdasyna qarsy qabyldanyp jatqan sharalar týraly aqparat berildi. Atap aıtqanda, elimiz adam quqyqtary salasyndaǵy 60-tan astam kópjaqty halyqaralyq kelisimge qosylǵan, onyń ishinde qazirgi zamanǵy quldyq túrlerimen kúreske qatysty 13 qujat bar.
Sondaı-aq Qazaqstannyń 2003 jyly qabyldanǵan EQYU-nyń Adam saýdasyna qarsy is-qımyl josparyna qosylǵany jáne ony iske asyrýǵa beıildiligi atap ótildi. Qazirgi ýaqytta elimiz 2027–2029 jyldarǵa arnalǵan ulttyq is-qımyl josparyn jańartý jumystaryn júrgizip jatyr.
Konferentsııa aıasyndaǵy «Tirshilik úshin qylmystandyrý: adam saýdasynyń jasyryn qyrlary» atty arnaıy sessııada qazaqstandyq sarapshy Sáken Qabıbýlla sóz sóıledi. Buryn ózi de adam saýdasynyń qurbany bolǵan ol Mıanmadaǵy tájirıbesimen bólisip, osyndaı jaǵdaılardyń aldyn alý boıynsha naqty usynystar aıtty.
Aıta keteıik, buǵan deıin Qyrǵyzstanda bala saýdasy úshin Qazaqstan azamatyna 12 jylǵa bas bostandyǵynan aıyrý jazasy taǵaıyndalǵan edi.
