Qazaqstannyń 64 muǵalimi «Úzdik pedagog» ataǵyna ıe boldy
Elimiz boıynsha ótkizilgen «Úzdik pedagog-2023» respýblıkalyq baıqaýynyń qorytyndysy shyǵaryldy, dep habarlaıdy Kazinform.
Oqý-aǵartý mınıstrliginiń baspasóz qyzmeti usynǵan aqparatqa súıensek, mektepke deıingi, orta, tehnıkalyq jáne kásiptik bilim berý uıymdarynyń 64 pedagogi óz mamandyǵy boıynsha úzdik atandy.
Sársenbi kúni mınıstr Ǵanı Beısembaev jeńimpazdarǵa saltanatty túrde marapattaryn tabystady.
«Muǵalim tek mamandyq emes, júrektiń tańdaýy, jannyń qalaýy. Qaı zamanda bolsyn aǵartýshylar qoǵamdy eń qundy dúnıe – bilimge jeteleıtin kórnekti tulǵalar sanaldy. Menińshe, pedagogterdiń jankeshti eńbeginiń máni osy. Jyl saıyn bizdiń muǵalimder halyqaralyq arenada joǵary jetistikterge jetýde. Keshe ǵana jarııalanǵan PISA-2022 jahandyq reıtınginiń nátıjeleri de – tikeleı bizdiń ustazdarymyzdyń eńbeginiń jemisi. Búgin sizderdiń aǵartýshylyq qyzmetterińizdiń mańyzdylyǵyn taǵy bir ret atap ótý úshin jınaldyq. Sizderdiń eren eńbekterińiz ben óz isterińizge adaldyqtaryńyz úshin shyn júrekten rızashylyǵymdy bildiremin», — dedi vedomstvo basshysy.
Konkýrs jeńimpazdary «Úzdik pedagog» kýáligin, «Úzdik pedagog» tósbelgisin jáne 3 450 000 teńge (1000 AEK) kóleminde aqshalaı syıaqy aldy.
Aıta keteıik, «Úzdik pedagog» konkýrsy 2012 jyldan bastap ótkizilip keledi. Osy kúnge deıin 624 pedagog úzdik dep tanylyp, olardyń árqaısysyna memlekettik qoldaý retinde 1000 aılyq eseptik kórsetkish mólsherinde syıaqy berildi.
«Bıyl konkýrsqa qatysý úshin barlyǵy 961 ótinim tústi. Konkýrsty ótkizý rásimi avtomattandyrylǵan jáne ol ashyq túrde ótti. Respýblıkalyq konkýrstyq komıssııanyń quramyna úkimettik emes uıymdar, ata-analar qaýymynyń ókilderi, jýrnalıster, belsendi pedagogter, bilim jáne ǵylym qyzmetkerleriniń Qazaqstandyq salalyq kásipodaǵynyń ókilderi jáne taǵy basqalary kirdi», - delingen mınıstrlik málimetinde.
