Qazaqstannyń 6 kompanııasy Iordanııaǵa qoı men sıyr etin eksporttaıdy
ASTANA. KAZINFORM – Bul týraly Aýyl sharýashylyǵy mınıstrliginde QR Aýyl sharýashylyǵy mınıstrligi Veterınarııalyq baqylaý jáne qadaǵalaý komıtetiniń ókilderi men Iordanııa Hashımıt Koroldiginiń veterınarııalyq qyzmeti delegatsııasynyń kezdesýinen málim boldy.
QR Aýyl sharýashylyǵy mınıstrligi baspasóz qyzmetiniń habarlaýynsha, kezdesýdiń negizgi taqyryby – qazaqstandyq sıyr eti, qoı eti jáne tiri maldy Iordanııa naryǵyna eksporttaý máseleleri boldy.
Kelissózder barysynda jáne taraptardyń veterınarııalyq qyzmetteri arasynda buǵan deıin júrgizilgen ózara árekettestiktiń nátıjesinde sıyr eti men qoı eti boıynsha mal sharýashylyǵy ónimderin eksporttaýǵa quqyǵy bar 6 qazaqstandyq kásiporynnyń Iordanııanyń resmı tizilimine engizilýine kelisim alyndy.
Aıta keteıik, Qazaqstan jyl saıyn et ónimderin óndirý men eksport kólemin arttyryp keledi. 2024 jyly Qazaqstannan 30 myń tonnadan astam sıyr jáne qoı eti eksporttaldy, onyń ishinde Taıaý Shyǵys elderine de jóneltildi. Otandyq ónim Dúnıejúzilik janýarlar densaýlyǵy uıymy (WOAH) tarapynan rastalǵan halyqaralyq sapa jáne qaýipsizdik standarttaryna tolyq sáıkes keledi.
Eske sala keteıik, bıyl aýyl sharýashylyǵy jobalaryna 50 mlrd teńge nesıe beriledi.